| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.509 | ekaikaśaśca pratināmagrahaṇam, āvedyamānā valāhakena vicalitamukuṭapadmarāgakiraṇodgamacchalenānurāgamivodvamadbhiḥ saṅghaṭitasevāñjalimukulatayā yauvarājyābhiṣekakalasāvarjitasalilalagnakamalairiva dūrāvanataiḥ śirobhiḥ praṇemuḥ / | | kad pb1.510 | candrāpīḍastu tān sarvān mānayitvā yathocitamanantaraṃ turaṅgamādhirūḍhenānugamyamāno vaiśampāyanena, rājalakṣmīnivāsayogyapuṇḍarīkākṛtinā, sakalarājanyakulakumudaṣaṇḍacandramaṇḍaleneva turaṅgamasenāsravantīpulināyamānena, kṣīrodaphenadhavalitavāsukiphaṇāmaṇḍalacchavinā, sthūlamuktākalāpajālakāvṛtena, uparicihnīkṛtaṃ kesariṇamudvahatā atimahatā kārttasvaradaṇḍena dhriyamāṇenātapatreṇa nivāritātapaḥ, ubhayataḥ samuddhūyamānacāmarakalāpapavananarttitakarṇapallavaḥ, puraḥ pradhāvatā taruṇavīrapuruṣaprāyeṇa, anekasahasrasaṃkhyena padātiparijanena, 'jaya jīve'ti ca madhuravacasā maṅgalaprāyam, anavaratamuccaiḥ paṭhatā vandijanena stūyamāno nagarābhimukhaḥ pratasthe / | | kad pb1.511 | krameṇa ca taṃ samāsāditavigrahamanaṅgamivāvatīṇa nagaramārgamanuprāptamavalokya sarva eva parityaktasakalavyāpāro rajanikarodayaparibudhyamānakumudavanānukārī janaḥ samajani' / |
|
