| har 5.46 | mandaṃ mandaṃ dvārapālaiḥ praṇamyamānaśca dīyamānasarvasvam, pūjyamānakuladevatam, prārabdhāmṛttacarupacanakriyam, kriyamāṇaṣaḍāhutihomam, hūyamānapṛṣadājyalavaliptapracaladūrvāpallavam, paṭhyamānamahāmāyūrīpravartyamānagṛhaśāntinirvartyamānabhūtarakṣābalividhānam, prayatavipraprastutasaṃhitājapaṃ jaṇyamānarudraikādaśīśabdāyamānaśivagṛham, atiśuciśaivasaṃpādyamānavirūpākṣakṣīrakalaśasahasrasnapanam, ajiropaviṣṭaiścānāsāditasvāmidarśanadūyamānamānasairabhyantaraniṣpatitanikaṭavartiparijananivedyamānavārtairvārtībhūtasnānabhojanaśayanairujjhitātmasaṃskāramalinaveśairlikhitairiva niścalairnarapatibhirnīyamānanaktaṃdivaṃ duḥkhadīnavadanena ca praghaṇeṣu baddhamaṇdalenopāṃśuvyāhṛtaiḥ kenaciccikitsakadoṣānudbhāvayatā, kenacidasādhyavyādhilakṣaṇapadāni paṭhatā, kenacidduḥsvapnānāvedayatā, kenacitpiśācavārtāṃ vivṛṇvatā, kenacitkārtāntikādeśānprakāśayatā, kenacidupaliṅgāni gāyatā, anyenānityatāṃ bhāvayatā, saṃsāraṃ cāpavadatā, kalikālavilasitāni ca nindatā, daivaṃ copālabhamānenāpareṇa dharmāya kupyatā, rājakuladevatāścādhikṣipatā, apareṇa kliṣṭakulaputrakabhāgyāni garhayatā, bāhyaparijanena kathyamānakaṣṭapārthivāvasthaṃ rājakulaṃ viveśa / | | har 5.47 | aviralabāṣpapayaḥpariplutalocanena pitṛparijanena vīkṣyamāṇo vividhauṣadhidravyadravagandhagarbhamutkvathatāṃ kvāthānāṃ sarpiṣāṃ tailānāṃ ca pacyamānānāṃ gandhamājighrannavāpa tṛtīyaṃ kakṣyāntaram / | | har 5.48 | tatra cātiniḥśabde gṛhāvagrahaṇīgrāhibahuvetriṇi, triguṇatiraskariṇītirohitasuvīthīpathe, pihitapakṣadvārake, parihṛtakavāṭaraṭite, ghaṭitagavākṣarakṣitamaruti, dūyamānaparicārake, caraṇatāḍanasvanatsopānaprakupitapratīhāre, nibhṛtasaṃjñānirdiśyamānasakalakarmaṇi, nātinikaṭopaviṣṭakaṅkaṭini, koṇasthitāhvānacakitācamanavāhini, candraśālikālīnamūkamaulaloke, mahādhividhurabāndhavāṅganāvargagṛhītapracchannapragrīvake, saṃjavanapuñjitodvignaparijane, praviṣṭakatipayapraṇayini gambhīrajvarārambhabhītabhiṣaji, durmanāyamānamantriṇi, mandāyamānapurodhasi, sīdatsuhṛdi, nidrāṇavipaściti, saṃtaptāptasāmante, vicittacāmaragrāhiṇi, duḥkhakṣāmaśirorakṣiṇi, kṣīyamāṇaprasādavittamanorathasaṃpadi, svāmibhaktiparityaktāhārahīyamānabalavikalavallabhabhūbhṛti, kṣititalapatitasakalarajanījāgarūkarājaputrakumārake, kulakramāgatakulaputranivahohyamānaśuciśokasaṃkucitakañcukini, n irānandavandini, hiḥśvasannirāśāsannasevake, niḥsṛtatāmbūladhūsarādharavārayoṣiti, vilakṣavaidyopadiśyamānapathyāharaṇāvahitapaurogave, anujīvipīyamānoccaṣakadhārāvārivinodyamānāsyaśoṣaruji, rājābhilāṣabhojyamānabahubhuji, bheṣajasāmagrīsaṃpādanavyagrasamagravyavahāriṇi, muhurmuhurāhūyamānato yakarmāntikānumitaghorāturatṛṣi, tuṣāraparikaritakarakaśiśirīkriyamāṇodaśviti, śvetārdrakarpaṭārpitakarpūraparāgaśītalīkṛtaśalāke, nāśyānapaṅkalipyamānanavabhāṇḍagatagaṇḍūṣagrahaṇamastuni, timyatkomalakamalinīpalāśaprāvṛtamṛdumṛṇālake, sanālanīlotpalapūlīsanāthasalilapānabhājanabhuvi, dhārānipātanirvāpyamāṇakvathitāmbhasi, paṭupāṭalaśarkarāmodamuci, mañcakāśritasikatilakarkarīviśrāntāntaracakṣuṣi, saralaśevalavalayitagaladgolayantrake, galvarkaśālājirollāsitalājasaktunipītamasārapārīparigṛhītakarkaśarkare, śiśirauṣadharasacūrṇāvakīrṇasphaṭikaśuktiśaṅkhasaṃcaye, saṃcitapracuraprācīnāmalakamātuluṅgadrākṣādāḍimādiphale, pratigrāhitavipraviprakīryamāṇaśāntyudakavipruṣi, preṣyāpeṣyamāṇalalāṭalepopadigdhadṛṣadi dhavalagṛhe sthitam, paralokavijayāya nīrājyamānamiva jvarajvalanenānavarataparivartanaistaraṅgiṇi śayanīye śeṣamiva viṣoṣmaṇā kṣīrodanvati viceṣṭamānam, muktāphalavālukādhūlidhavalitaṃ jaladhimiva kṣayakāle śuṣyantam, kālena kailāsamiva daśānanenoddhriyamāṇam, aviratacandanacarcāparāṇāṃ paricārakāṇāmatyuṣṇāvayavasparśabhasmībhūtodarairiva dhavalaiaḥ karaiḥ spṛśyamānaṃ lokāntaraprasthitam, sthāsnunā svayaśasaiva candanānulepanacchalenāpṛcchyamānam, avicchinnadīyamānakamalakumudendīvaradalam, kālakaṭākṣapatanaśabalamiva śarīramudvahantam, nibiḍadukūlapaṭṭanipīḍitakeśāntakathyamānakaṣṭavedanānubandhaṃ mūrdhānaṃ dhārayantam, durdharavedanonnamatrīlaśirājālakakarālena ca kālāṅgulilikhyamānalekhākhyātamaraṇāvadhidivasasaṃkhyāneneva lalāṭaphalakena bhayamupajanayantam, āsannayamadarśanodvegādiva ca kiṃcidantaḥpraviṣṭatārakam, śuṣyadṛśanapaṅktiprasṛtadhūsaradīdhititaraṅgirṇāṃ mṛgatṛṣṇikāmivoṣṇāṃ niśvāsaparamparāmudvahantam, atyuṣṇaniśvāsadagdhayeva śyāmāyamānayā rasanayā nivedyamānadāruṇasaṃnipātārambham, uraḥsthalasthāpitamaṇimauktikahāracandanacandrakāntam, kṛtāntadūtadarśanayogyamivātmānaṃ kurvāṇam, aṅgabhaṅgavalanotkṣiptabhujayugalam, paryastahastanakhamayūkhairdhārāgṛhamiva tāpaśāntaye racayantam, nediṣṭhasalilamaṇikuṭṭimādarśodareṣu nipatadbhiḥ pratibimbairapi saṃtāpātiśayamiva kathayantam, spṛśantīṃ praṇayinīmiva viśvāsabhūmiṃ mūrchāṃ bahu manyamānam, antakāhvānākṣarairiva sabhayabhiṣagdṛṣṭairariṣṭairāviṣṭam, mahāprasthānakāle svasaṃtāpasaṃtānamāptahṛdayeṣu saṃcārayantam, aratiparigṛhītamīrṣyayeva chāyayā mucyamānam, udyogamivopadravāṇām, sarvāstramokṣamiva kṣāmatāyāḥ, hastīkṛtaṃ vihastatayā, viṣayīkṛtaṃ vaiṣamyeṇa, kṣetrīkṛtaṃ kṣayeṇa, gocarīkṛtaṃ glānyā, daṣṭaṃ duḥkhāsikayā, ātmīkṛtamasvāsthyena, vidheyīkṛtaṃ vyādhinā, kroḍīkṛtaṃ kālena, lakṣyīkṛtaṃ dakṣiṇāśayā, pītamiva pīḍābhiḥ, jagdhamiva jāgareṇa, nirgīrṇamiva vaivarṇyena, grāsīkṛtaṃ gātrabhaṅgena, hriyamāṇamiva vipadbhiḥ, daṇṭyamānamiva vedanābhiḥ, luṇṭhyamānamiva duḥkhaiḥ, āditsitaṃ daivena, nirūpitaṃ niyatyā, ghrātamanityatvena, abhibhūyamānamabhāvena, parikalitaṃ parāsutayā, dattāvakāśaṃ kleśasya, nivāsaṃ vaimanasyasya, samīpe kālasya, antike'ntyocchvāsasya, mukhe mahāprayāsasya, dvāri dīrghanidāyāḥ, jihvāgre jīviteśasya vartamānam, viralaṃ vāci, calitaṃ cetasi, vihvalaṃ vapuṣi, kṣīṇamāyuṣi, pracuraṃ pralāpe, saṃtataṃ śvasite, jitaṃ jṛmbhikābhiḥ, parādhīnamādhibhiḥ, anubaddhamanubandhikābhiḥ, pārśvopaviṣṭayānavaratarodanocchūnanayanayā gṛhītacāmarikayāpi niśvasitaireva vījayantyā vividhauṣadhidhūlidhūsaritaśarīrayā muhurmuhuḥ "āryaputra, svapiṣi" iti vyāharantyā devyā yaśovatyā śirasi vakṣasi ca spṛśyamānaṃ pitaramadrākṣīt / |
|
