| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.45 | āsīdaśeṣanarapatiśiraḥsamabhyarccitaśāsanaḥ pākaśāsana ivāparaḥ, caturudadhimālāmekhalāyā bhuvo bharttā, pratāpānurāgāvanatasamastasāmantacakraḥ, cakravartilakṣaṇopetaḥ, cakradhara iva karakamalopalakṣyamāṇaśaṅkhacakralāñchanaḥ, hara iva jitamanmathaḥ, guha ivāpratihataśaktiḥ, kamalayoniriva vimānīkṛtarājahaṃsamaṇḍalaḥ, jaladhiriva lakṣmīprasūtiḥ, gaṅgāpravāha iva bhagīrathapathapravṛttaḥ, raviriva pratidivasopajāyamānodayaḥ, meruriva sakalopajīvyamānapādacchāyaḥ, diggaja ivānavaratapravṛttadānārdrīkṛtakaraḥ karttā mahāścaryyāṇām, āharttā kratūnām, ādarśaḥ sarvaśāstrāṇām, utpattiḥ kalānām, kulabhavanaṃ guṇānām, āgamaḥ kāvyāmṛtarasānām, udayaśailo mitramaṇḍalasya, utpātaketurahitajanasya, pravarttayitā goṣṭhībandhānām, āśrayo rasikānām, pratyādeśo dhanuṣmatām, dhaureyaḥ sāhasikānām, agraṇīrvidagdhānām, vainateya iva vinatānandajananaḥ, vainya iva cāpakoṭisasutsāritasakalārātikulācalo rājā śūdrako nāma / | | kad pb1.46 | nāmnaiva yo nirbhannārātahṛdayo viracitanarasiṃharūpāḍambaram, ekavikramākrāntasakalabhuvanatalo vikramatrayāyāsitabhuvanatrayaṃ jahāseva vāsudevam / | | kad pb1.47 | aticirakālalagnamatikrāntakunṛpatisahasrasamparkakalaṅkamiva kṣālayantī yasya vimale kṛpāṇadhārājale ciramuvāsa rājalakṣmīḥ / |
|
