| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.1163 | pratyūṣasi tūtthāya tasminneva sarasi snātvā, kṛtaniścayā, tatprītyā tameva kamaṇḍalumādāya tānyeva ca valkalāni tāmevākṣamālāṃ gṛhītvā, buddhvā niḥsāratāṃ saṃsārasya, jñātvā ca mandapuṇyatāmātmanaḥ, nirūpya cāpratīkāradāruṇatāṃ vyasanopanipātānām, ākalayya dunivāratāṃ śokasya, dṛṣṭvā ca niṣṭhuratāṃ daivasya, cintayitvā cātibahuladuḥkhatāṃ snehasya bhāvayitvācānityatāṃ sarvabhāvānām, avadhāryya cākāṇḍabhaṅguratāṃ sarvasukhānām, avigaṇayya tātamambāñca, parityajya saha parijanena sakalabandhuvargam, nivartya viṣayasukhebhyo manaḥ, sayamyendriyāṇi, gṛhītabrahmacaryyā devaṃ trailokyanāthamanāthaśaraṇam imaṃ śaraṇāthinī sthāṇumāśritā / | | kad pb1.1164 | aparedyaśca kuto'pi samupalabdhavṛttāntastātaḥ sahāmbayā saha bandhuvargeṇāgatya suciraṃ kṛtākrandastaistairupāyaiḥ, abhyarthanābhiśca bahvībhiḥ, upadeśaiścānekaprakāraiḥ, sāntvanaiśca nānāvidhaiḥ, gṛhagamanāya me mahāntaṃ yatnamakarot / | | kad pb1.1165 | yadā ca neyamasmādvyavasāyāt kathañcidapi śakyate vyāvarttayitumiti niścayamadhigatavān, tadā nirāśo'pi dustyajatayā duhitṛsnehasya, punaḥ punarmayā visṛjyamāno'pi bahūn divasān sthitvā, saṣoka evāntardahyamānahṛdayo gṛhānayāsīt / |
|
