|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.146 | antarite ca tasmin śabarasenāpatau sa jīrṇaśabaraḥ pibannivāsmākamāyūṃṣi rudhirabindupāṭalayā kapilabhrūlatāpariveṣabhīṣaṇayā dṛṣṭyā gaṇayanniva śukakulakulāyasthānāni śyena iva vihagāmiṣāsvādalālasaḥ suciramārurukṣustaṃ vanaspatimāmūlādapaśyat / | | kad pb1.147 | utkrāntamiva tasmin kṣaṇe tadālokanabhītānāṃ śukakulānāmasubhiḥ / | | kad pb1.148 | kimiva hi duṣkaramakaruṇānām? yataḥ sa tamanekatālatuṅgamabhraṅkaṣaśākhāśikharamapi sopānairivāyatnenaiva pādapamāruhya tānanupajātotpatanaśaktīn, kāṃścidalpadivasajātān garbhacchavipāṭalān śālmalīkusumaśaṅkāmupajanayataḥ, kāṃścidudbhidyamānapakṣatayā nalinasaṃvirttikānukāriṇaḥ, kāṃścidarkaphalasadṛśān, kāṃścillohitāyamānacañcukoṭīn īṣadvighaṭitadalapuṭapāṭalamukhānāṃ kamalamukulānāṃ śriyamudvahataḥ, kāṃścidanavarataśiraḥkampavyājena nivārayata iva pratīkārāsamarthān, ekaikaśaḥ phalānīva tasya vanaspateḥ śākhāsandhibhyaḥ koṭarāntarebhyaśca śukaśāvakānagrahīt, apagatāsūṃśca kṛtvā kṣitāvapātayat / |
|
| |
|
| |
