| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.1245 | parasukhopapādanaparādhīnaśca bhavādṛśāṃ guṇodayaḥ' ityuktavatīñcaināṃ candrāpīḍo'bravīt ?? 'bhavati! darśanātprabhṛti paravānayaṃ janaḥ karttavyeṣu yatheṣṭamaśaṅkitatayā niyujyatām' ityabhidhāya tayā sahaivodacalat / | | kad pb1.1246 | krameṇa ca gatvā hemakūṭamāsādya gandharvarājakulam, samatītya kāñcanatoraṇāni saptakakṣāntarāṇi kanyāntaḥ puradvāramavāpa / | | kad pb1.1247 | mahāśvetādarśanapradhāvitena dūrādeva kṛtapraṇāmena kanakavetralatāhastena pratīhārajanenopadiśyamānamārgaḥ praviśya asaṃkhyayanārīśatasahasrasambādham, strīmayamaparamiva jīvalokam, iyattāṃ grahītumekatra trailokyastraiṇamiva saṃgṛhītam, apuruṣamiva sargāntaram, aṅganādvīpamivāpūrvamutpannam, pañcamamiva nārīyugāvatāram, aparamiva puruṣadveṣiprajāpatinirmāṇam, anekakalpakalpanārthamutpādya sthāpitamivāṅganākoṣam, ativistāriṇā yuvatijanalāvaṇyaprabhāpūreṇa plāvitadigantareṇa siñcatevāmṛtarasavisareṇa divasamārdrīkurvateva bhuvanāntarālaṃ bahulaprabhāvarṣiṇā marakatamaṇimayena sarvataḥ parigatatayā tejomayamiva, candramaṇḍalasahasrairiva nirmitasaṃsthānam, jyotsnayeva ghaṭitasanniveśam, ābharaṇaprabhābhirivaniṣpāditadigantaram, vibhramairiva kṛtasarvopakaraṇam, yauvanavilāsairivotpāditāvayavam, rativilasitairiva racitasañcayam, manmathācaritairiva kalpitāvakāśam, anurāgeṇevānuliptasakalapradeśam, śṛṅgāramayamiva, saundaryamayamiva, suratādhidaivatamayamiva, kusumaśaramayamiva, kutūhalamayamiva, āścaryamayamiva, saukumāryamayamiva, kumāraḥ kumārīpurāhbyantaraṃ dadarśa / |
|
