| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.1201 | atrāntare ca śrutamahāśvetāvṛttāntopajātaśoka iva samutsṛṣṭadivasavyāpāro ravirapi bhagavānadhomukhatāmayāsīt atha kṣīṇe divase, pariṇatapriyaṅgumañjarīrajonibhena piñjarimṇārajyamāne vilambini vradhnamaṇḍale, aviralakusumbhakusumarasaraktadukūtakomalena cāstātapena mucyamāneṣu diṅmukheṣu, cakoranayanatārakākāntinā ca piṅgalimnā vilipyamāne tirohitanīlimni vyomni, kākilavilocanacchavibabhrūṇi cāruṇayati sādhye bhuvanamarcciṣi, yathāpradhānamunmiṣatsu grahagrāmeṣu, vanamahiṣamalīmasavapuṣi ca locanamuṣi muṣitatārakāpathaprathimni kālimānamātanvati śarvare tamasi, atanutimiratirohitaharitabhāsu gahanatāṃ yāntīṣu tarurājiṣu, rajanijalabindujālajanitajaḍimni bahalavanakusumaparimalānumitagamane calitalatāviṭapagahane pravṛtte ca pavane, nidrānibhṛtapatattriṇi triyāmāmukhe, mahāśvetā mandaṃ mandamutthāya bhagavatīmupāsya paścimāṃ sandhyām, kamaṇḍalujalena prakṣālitacaraṇā valkalaśayanīye sakhedamuṣṇañca niḥścasya niṣāsāda / | | kad pb1.1202 | candrāpīḍo'pyutthāya sakusumaṃ prasravaṇajalāñjalimavakīryya kṛtasandhyāpraṇāmastasmin, dvitīye śilātale mṛdubhirlatāpallavaiḥ śayyāmakalpayat / | | kad pb1.1203 | upaviṣṭaśca tasyāṃ punaḥpunaḥ tameva manasā mahāśvetāvṛttāntamanvabhāvayat / |
|
