| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.1582 | astamupagate ca bhagavati saptasaptau, āvāsiteṣu yathāsampannapādapataleṣu rājasūnuṣu, śakhāvasaktāpanītaparyāṇeṣu kṣititalaluṇṭhanapāṃśulasaṭāvadhūnanānumitotsāheṣu gṛhītakatipayaśaṣyakavaleṣu pītodakeṣu snānārdrapṛṣṭhatayā vigataśramameṣu puronikhātakuntayaṣṭiṣu saṃyateṣu vājiṣu, vājisamīpaviracitaparṇasaṃstare ca divasagamanakhinnaparivarttitayāmike suṣupsati sainikajane, kṛtabahupāvakaprabhāpītatamasi divasa iva virājamāne senāniveśe candrāpīḍaḥ parijanenaikadeśe saṃyatasyendrāyudhasya puraḥ parikalpitaṃ pratīhāraniveditaṃ śayanīyamagāt / | | kad pb1.1583 | niṣaṇṇasya cāsya tatkṣaṇameva pasparśa duḥkhāsikā hṛdayam, aratigṛhītaśca visarjayāmbabhūva rājalokam, ativallabhānapi nālalāpa pārśvasthān, nimīlitalocano muhurmuhurmanasā jagāma kimpuruṣaviṣayam, ananyacetāḥ sasmāra hemakūṭasya, niṣkāraṇabāndhavatāmacintayanmahāśvetāpādānām, jīvitaphalamabhilalāṣa punaḥ punaḥ kādambarīdarśanam, apagatābhimānapeśalāya nitarāmaspṛhayanmadalekhāparicayāya, tamālikāṃ draṣṭumācakāṅkṣa, keyūrakāgamanamutpraikṣata, himagṛhakamapaśyat, uṣṇamāyataṃ punaruktaṃ niśaśvāsa babandha cādhikāṃ prītiṃ śeṣahāre, paścāt sthitāṃ puṇyabhāginīmamanyata patralekhām, evañcānupajātanidra eva tāmanayanniśām / | | kad pb1.1584 | uṣasi cotthāya tasya jaraddraviḍadhārmikasyecchayā nisṛṣṭairdhanavisaraiḥ pūrayitvā manoratham, abhimatamabhiramaṇīyeṣu pradeśeṣu nivasannalpairevāhobhirujjayinīmājagāma / |
|
