| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.516 | anantarañca 'samāptasakalavidyo vidyāgṛhānnirgato'yamāgacchati candrāpīḍaḥ' iti samākarṇyālokanakutūhalinyaḥ sarvasminneva nagare sasambhramamutsṛṣṭārddhaparisamāptaprasādhanavyāpārāḥ, kāścidvāmakaratalagatadarpaṇāḥ sphuritasakalarajanikaramaṇḍalā iva paurṇamāsīrajanyaḥ, kāścidārdrālaktakarasapāṭalitacaraṇapuṭāḥ kamalaparipītabālātapā iva nalinyaḥ, kāścit sasambhramagativigalitamekhalākalāpākulitacaraṇakisalayāḥ śṛṅkhalāsandānamandamanda sañcāriṇya iva kariṇyaḥ, kāścijjaladharasamayadivasaśriya ivendrāyudharāgarucirāmbaradhāriṇyaḥ, kāścidullasitadhavalanakhamayūkhapallavān nūpuraravākṛṣṭagṛhakalahaṃsakāniva caraṇapuṭānudvahantyaḥ, kāścit karatalasthitasthūlamuktāhārayaṣṭayo ratimiva madanavināśaśekagṛhītasphaṭikākṣavalayāṃ biḍambayantyaḥ, kāścit payodharāntarālagalitamuktālatāstadanuvimalasrotojalāntaritacakravākamithunā iva pradoṣaśriyaḥ, kāścinnūpuramaṇisamutthitendrāyudhatayā paricayānugatagṛhamayūrikā iva virājantyaḥ kāścidaddhapītojjhitamaṇicaṣakāḥ sphuritarāgairmadhurasamivādharapallavaiḥ kṣarantyo harmyatalāni lalanāḥ samāruruhuḥ / | | kad pb1.517 | anyāśca marakatavātāyanavivaravinirgatamukhamaṇḍalā vikacakamalakoṣapuṭāmambaratalasañcāriṇīṃ kamalinīmiva darśayantyo dadṛśuḥ / | | kad pb1.518 | udapādi ca sahasā sarabhasasañcalanajanmā, madhurasāraṇāsphālitavīṇāravakolāhalabahalaḥ, raśanāravāhūtagṛhasārasa rasitasambhinnaḥ, skhalitacaraṇatalatāḍitamaṇisopānajātagambhīradhvaniprahṛṣṭānāmavarodhaśikhaṇḍināṃ kekāravairanugamyamānaḥ, navajaladhararavabhayacakitakalahaṃsakulakolāhalakomalaḥ, makaradhvajavijayaghoṣaṇānukārī parasparavidhaṭṭanāraṇitatāratarahāramaṇīnāṃ ramaṇīnāṃ śrotrahārī, harmyakukṣiṣu pratiravanirhrādī bhūṣaṇaninādaḥ / |
|
