| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.1403 | candrāpīḍo'pi tasmādavatīrya prathamavisajitenaiva kādambarīparijanena nirvarttitasnānavidhirnirupahataśilātalāccitābhimatadaivataḥ krīḍāparvataka eva sarvamāḥārādikamahaḥkarma cakre / | | kad pb1.1404 | krameṇa ca kṛtāhāraḥ krīḍāparvatakaprāgbhāgabhāji, manohāriṇi, hārītaharite, hariṇīromanthaphenaśīkarāsāre, sīrāyudhahalabhayaniścalakālindījalatviṣi, taruṇīcaraṇālaktakarasaśoṇaśociṣi, sukumarajaḥsikatilatale, latāmaṇḍapopagūḍhe, śikhaṇḍitāṇḍavasaṅgītagṛhe, marakataśilātale samupaviṣṭaḥ dṛṣṭavān sahasaivātibahaladhāmnā dhavalenālokena jaleneva nirvāpyamāṇaṃ divasam, mṛṇālavalayeneva pīyamānamātapam, kṣīrodenevaplāvyamānāṃ mahīm, candanarasavarṣeṇeva sicyamānān digantān sudhayeva vilipyamānamambaratalam / | | kad pb1.1405 | āsīccāsya manasi ?? kimu khalu bhagavānoṣadhipatirakāṇḍa eva śītāṃśurudito bhavet, uta yantravikṣepaviśīryamāṇapāṇḍurajaladhārāsahasrāṇi dhārāgṛhāṇi muktāni, ahosvidanilavikīryamāṇaśikaradhavalitabhuvanambarasindhurdharātalamavatīrṇe'ti / |
|
