Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
kad pb1.800 | upajātajalāśayaśaṅkaśca taṃ pratīpamanusaran, udgrīvadṛśyairuparicchatramaṇḍalākāraiḥ saralasālasallakīprāyairaviralairapi niḥśākhatayā viralairivopalakṣyamāṇaiḥ pādapairupetena, sthūlakapilabālukena, śilāvahulatayā viralatṛṇolapena, vanadvipadaśanadalitamanaḥśilādhūlikapilena, ābhaṅginībhirutkīrṇābhiriva patrabhaṅgakuṭilābhiḥ pāṣāṇabhedanamañjarībhirjaṭilīkṛtaśilātalena, | kad pb1.801 | anavaratagaladgugguludrumadravārdrīkṛtadṛṣadā, śikharasrutaśilājaturasapicchilopalena, ṭaṅkanahayakhurakhaṇḍitaharitālakṣodapāṃśulena, ākhunakharotkhātabilaviprakīrṇakāñcanacūrṇena, sikatānimagnacamarakastūrikāmṛgīkhurapaṅktinā, saṃśīrṇaraṅkurallakaromaprakaranicitena, viṣamaśilācchedopaviṣṭajīvañjīvakayugalena, vanamānuṣamithunādhyāsitataṭaguhāmukhena, gandhapāṣāṇaparimalāmodinā, vetralatāpratānaprarūḍhaveṇunā kailāsatalena, kañcidadhvānaṃ gatvā tasyaiva kailāsaśikhariṇaḥ pūrvottare digbhāge jalabhārālasaṃ jaladharavyūhamiva bahulapakṣakṣapāndhakāramiva puñjīkṛtamatyāyataṃ taruṣaṇḍaṃ dadarśa / | kad pb1.802 | tacca sammukhādāgatena kusumarajaḥkaṣāyāmodinā jalasaṃsargaśiśireṇa śīkariṇā candanarasasparśena āliṅgyamāna iva jalataraṅgamārutena, kamalamadhupānamattānāñca śrotrahāribhiḥ kalahaṃsānāṃ kolāhalairāhūyamāna iva praviveśa / |
|