| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 1.291 | yasmādajāyanta vātsyāyanā nāma gṛhamunayaḥ, āśritaśrautā apyanālambitālīkabakakākavaḥ, kṛtakukkuṭavratā apyabaiḍālavṛttayaḥ, vivarjitajanapaṅktayaḥ, parihṛtakapaṭakīrakucīkūrcākūtāḥ, agṛhītagahvarāḥ, nyakkṛtanikṛtayaḥ, prasannaprakṛtayaḥ, vigatavikṛtayaḥ, paraparivādaparācīnacetasaḥ, varṇatrayavyāvṛttiviśuddhāndhasaḥ, dhīradhiṣaṇāvadhūtādhyeṣaṇāḥ, asaṅkasukasvabhāvāḥ, praṇatapraṇayinaḥ, śamitasamastaśākhāntarasaṃśītayaḥ, uddhāṭitasamagragranthārthagranthayaḥ, kavayaḥ, vāgminaḥ, vimatsarāḥ, sarasabhāṣitavyasaninaḥ, vidagdhaparihāsavedinaḥ, paricayapeśalāḥ, nṛtyagītavāditreṣvabāhyāḥ, aitihyasyāvitṛṣṇāḥ, sānukrośāḥ, satyaśucayaḥ, sādhusaṃmatāḥ, sarvasattvasauhārdadravārdrahṛdayāḥ, tathā sarvaguṇopetā rājasenānabhibhūtāḥ, kṣamābhāja āśritanandanāḥ, anistriṃśā vidyādharāḥ, ajaḍāḥ kalāvantaḥ, adoṣāstārakāḥ, aparopatāpino bhāsvantaḥ, anuṣmāṇo hutabhujaḥ, akusṛtayo bhoginaḥ, astambhāḥ puṇyālayāḥ, aluptakratukriyā dakṣāḥ, avyālāḥ kāmajitaḥ, asādhāraṇā dvijātayaḥ / | | har 1.292 | teṣu caivamutpadyamāneṣu, saṃsarati saṃsāre, yātsu yugeṣu, avatīrṇe kalau, vahatsu vatsareṣu, vrajatsu vāsareṣu, atikrāmati ca kāle, prasavaparamparābhiranavaratamāpatati vikāśini vātsyāyanakule, krameṇa kuberanāmā vainateya iva gurupakṣapātī dvijo janma lebhe / | | har 1.293 | tasyābhavannacyuta īśāno haraḥ pāśupataśceti catvāro yugārambhā iva brāhmatejojanyamānaprajāvistārā nārāyaṇabāhudaṇḍā iva saccakranandakāstanayāḥ / |
|
