| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.403 | taduttiṣṭha, svayameva gatvā kimatra satyamiti devīṃ pṛṣṭvā jñāsyāmi' / | | kad pb1.404 | ityabhidhāya visṛjya sakalanarendralokam, unmucya svāṅgebhyo bhūṣaṇāni kulavarddhanāyai dattvā, tayā ca dattaprasādānantaramavanitalāśliṣṭalalāṭarekhayā śiraḥpraṇāmenābhyarccitaḥ, saha śukanāsenotthāya harṣaviśeṣānirbhareṇa tvaryyamāṇaḥ manasā, pavanacalitanīlakuvalayadalalīlābiḍambakena dakṣiṇenākṣṇā parisphuratā'bhinandyamānaḥ tatkālasevāsamucitena viralaviralena parijanenānugamyamānaḥ puraḥ saṃsarpiṇīnāmanilalolaśikhānāṃ pradīpikānāmālokena samutsāryyamāṇakakṣāntaratimiram antaḥpuramayāsīt / | | kad pb1.405 | tatra ca sukṛtarakṣāsaṃvidhāne, navasudhānulepanadhavalite, prajvalitamaṅgalapradīpe, pūrṇakalasādhiṣṭhitapakṣake, pratyagralikhitamaṅgalyālekhyojjvalabhittibhāgamanohāriṇi, samuparacitasitavitānaparyyantāvabaddhamuktāguṇe maṇipradīpaprahatatimire vāsabhavane, bhūmilikhitapatralatākṛtarakṣāparikṣepam, śayanaśirobhāgavinyastadhavalanidrākalasam, ābaddhavividhauṣadhimūlayantrapavitram, avasthāpitarakṣāśaktivalayam, itastato vikīrṇagaurasarṣapam, avalambitabālayoktragrathitalauhapippalapatram, āsaktaharitāriṣṭapallavam, uttuṅgapādapīṭhapratiṣṭhitam, indudīghitidhavalapracchadapaṭam, acalarājaśilātalaviśālam garbhocitaṃ śayanatalamadhiśayānām, kanakapātraparigṛhītaiḥ avicchinnaviralāvasthitadadhilavaiḥjalataraṅgataralaśvetaśālisikthanikaraiḥ agrathitakusumasanāthaiḥ pūrṇabhājanaiḥ, akhiṇḍitānanamatsyapaṭalaiśca pratyagrapiśitapiṇḍamiśraiḥ, avicchinnasaliladhārānugamyamānamārgaiḥ, paṭalakaprajvalitaiśca śītalapradīpaiḥ, gorocanāmiśragaurasarṣapaiśca salilāñjalibhiśca, ācārakuśalenāntaḥpurajaratījanena kriyamāṇāvatāraṇakamaṅgalām, dhavalāmbaraviviktaveṣeṇa pramuditena prastutamaṅgalaprāyālāpena paurajanenopāsyamānām, upārūḍhagarbhatayā'ntargatakulaśailāmiva kṣitim, salilanimagnairāvatāmiva mandākinīm, guhāgatasiṃhābhiva girirājamekhalām, jaladharapaṭalāntaritadinakarāmiva divasaśriyam, udayagiritirohitaśaśimaṇḍalāmiva vibhāvarīm, abhyarṇabrahmakamalavinirgamāmiva nārāyaṇanābhim, āsannāgastyodayāmiva dakṣiṇāśām, phenāvṛtāmṛtakalasāmiva kṣīrodavelām, gorocanācitritadaśamanupahatamatidhavalaṃ dukūlayugalaṃ vasānāṃ vilāsavatīṃ dadarśa / |
|
