| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.977 | anayā ca me dṛṣṭayā diṅmohabhrāntyeva pranaṣṭavartmanaḥ, bahulaniśayevāndhasya, jihvocchittyeva mūkasya, indrajālikapicchikayevātattvadarśinaḥ, jvarapralāpapravṛttyevāsambaddhabhāṣiṇaḥ, duṣṭanidrayeva viṣavihvalasya, lokāyatikavidyayevādharmmaruceḥ, madirayevonmattasya, duṣṭāveśakriyayeva piśācagrahasya, doṣavikāropacayaḥ sutarāmakriyata smarāturasya me manasaḥ, yenākulīkriyamāṇā saridiva pūreṇa vihvalatāmabhyagamam / | | kad pb1.978 | tāñca dvitīyadarśanena kṛtamahāpuṇyāmiva anubhūtasuralokavāsāmiva devatādhiṣṭhitāmiva labdhavarāmiva pītāmṛtāmiva samāsāditatrailokyarājyābhiṣekāmiva manyamānā, satatasannihitāmapi durllabhadarśanāmiva atiparicitāmapyapūrvāmiva sādaramābhāṣamāṇā, pārśvāvasthitāmapi sarvalokasyoparyyavasthitāmiva paśyantī, kapolayoralakalatābhaṅgeṣu ca sopagrahaṃ spṛśantī, viparītamiva parijanasvāmisambandhamupadarśayantī, 'taralike! kathaya kathaṃ sa tvayā dṛṣṭaḥ, kimabhihitāsi tena, kiyantaṃ kālamavasthitāsi tatra, kiyadanusarannasmānasāvāgataḥ' iti punaḥ punaḥ paryyapṛccham / | | kad pb1.979 | anayaiva ca kathayā tayā saha tasminneva prāsāde tathaiva pratiṣiddhāśeṣaparijanapraveśā divasamatyavāhayam / |
|
