| kad pb1.149 | tātastu taṃ mahāntamakāṇḍa eva prāṇaharamapratīkāraupaplavamupanatamavalokya dviguṇataropajātavepathurmaraṇabhayādudbhrāntataralatārakāṃ viṣādaśūnyāmaśrujalaplutāṃ dṛśamitastato dikṣu vikṣipan, ucchuṣkatālurātmapratīkārākṣamaḥ trāsasrastasandhiśithilena pakṣapuṭenācchādya māṃ tatkālocitapratīkāraṃ manyamānaḥ snehaparavaśo madrakṣaṇākulaḥ kikarttavyatāvimūḍhaḥ kroḍabhāgena māmavaṣṭabhya tasthau / | | kad pb1.151 | māntu svalpaśarīratvād bhayasampīḍitāṅgatvāt sāvaśeṣatvāccāyuṣaḥ kathamapi tatpakṣapuṭāntaragataṃ nālakṣayat / | | kad pb1.160 | ajātapakṣatayā ca nātisthirataracaraṇasañcārasya muhurmuhurmukhena patato muhustiryaṅnipatantamātmānamekayā pakṣapālyā sandhārayataḥ kṣititalasaṃsarpaṇaśramāturasya anabhyāsavaśādekamapidattvā padamanavaratamunmukhasya, sthūlasthūlaṃ śvasato dhūlidhūsarasya saṃsarpato mamābhūnmanasi ?? 'atikaṣṭāsu daṃśāsvapi jīvitanirapekṣā na bhavanti khalu jagati prāṇināṃ vṛttayaḥ / | | kad pb1.177 | tattanayaśca hārītanāmā munikumārakaḥ sanatkumāra iva sarvavidyāvadātacetāḥ, samānavayobhiraparaistapodhanakumārakairanugamyamānastenaiva pathā dvitīya iva bhagavān vibhāvasuratitejasvitayā durnirīkṣyamūrttiḥ, udyato divasakaramaṇḍalādivotkīrṇaḥ taḍidbhiriva viracitāvayavaḥ, taptakanakadraveṇeva bahirupaliptamūrttiḥ, āpiśaṅgāvadātayā dehaprabhayā sphurantyā sabālātapamiva divasaṃ sadāvānalamiva vanamupadarśayan, uttaptalauhalohinīnāmanekatīrthābhiṣekapūtānāmaṃsasthalāvalambinīnāṃ jaṭānāṃ nikareṇopetaḥ, stambhitaśikhākalāpaḥ, khāṇḍavavanadidhakṣayā kṛtakapaṭavaṭuveśa iva bhagavān dakṣiṇaśravaṇāvalambinā virājamānaḥ, sakalaviṣayopabhoganivṛttyarthamupapāditena lalāṭapaṭṭake trisatyeneva bhasmatripuṇḍrakeṇālaṅkṛtaḥ, gaganagamanonmukhabalākānukāriṇā svargamārgamiva darśayatā satatamudprīveṇa sphaṭikamaṇikamaṇḍalunādhyāsitavāmakaratalaḥ, skandhadeśāvalambinā kṛṣṇājinena nīlapāṇḍubhāsā tapastṛṣṇānipītenāntarniṣpatatā dhūmapaṭaleneva parītamūrttiḥ, abhinavabisasūtranirmiteneva parilaghutayā pavanalolena nirmmāṃsaviralapārśvāsthipañjaramiva gaṇayatā vāmāṃṣāvalambinā yajñopavītenodbhāsamānaḥ, devatārccanārthamāgṛhītavanalatākusumaparipūrṇaparṇapuṭasanāthaśikhareṇāṣāḍhadaṇḍena vyāpṛtasavyetarapāṇiḥ, viṣāṇaśikharotkhātāmudvahatā srānamṛdamupajātaparicayena nīvāramuṣṭisaṃvarddhitena kuśakusumalatāyāsyamānaloladṛṣṭinā tapovanamṛgeṇānugamyamānaḥ, viṭapa iva komalavalkalāvṛtaśarīraḥ, giririva samekhalaḥ, rāhurivāsakṛdāsvāditasomaḥ, padmanikara iva divasakaramarīcipaḥ, nadītaṭataruriva satatajalakṣālanavimalajaṭaḥ, karikarabha iva vikacakumudadalaśakalasitadaśanaḥ, drauṇiriva kṛpānugataḥ, nakṣatrarāśiriva citramṛgakṛttikāśleṣopaśobhitaḥ, gharmmakāladivasa iva kṣayitadoṣaḥ, jaladharasamaya iva praśāmitarajaḥprasaraḥ, varuṇa iva kṛtodavāsaḥ, haririvāpanītanarakabhayaḥ, pradoṣārambha iva sandhyāpiṅgalatārakaḥ prabhātakāla iva bālātapakapilaḥ, raviratha iva dṛḍhaniyamitākṣacakraḥ, surājeva nigūḍhamantrasādhanakṣapitavigrahaḥ, jaladhiriva karālaśaṅkhamaṇḍalāvarttanābhigarttaḥ, bhagīratha iva dṛṣṭagaṅgāvatāraḥ, bhramara ivāsakṛdanubhūtapuṣkaravanavāsaḥ, vanacaro'pi kṛtamahālayapraveśaḥ, asaṃyato'pi mokṣārthī, sāmaprayogaparo'pi satatāvalambitadaṇḍaḥ, supto'pi prabuddhaḥ, sannihitanetradvayo'pi parityaktavāmalocanastadeva kamalasaraḥ sisnāsurupāgamat / | | kad pb1.178 | prāyeṇākāraṇamitrāṇyatikaruṇārdrāṇi ca sadā khalu bhavanti satāṃ cetāṃsi! yataḥ sa māṃ tadavasthamālokya samupajātakaruṇaḥ samīphvarttinamṛṣikumārakamanyatamamabravīt 'ayaṃ kathamapi śukaśiśurasañjātapakṣapuṭa eva taruśikharādasmāt paricyutaḥ / | | kad pb1.186 | anatidūramiva gatvā diśi diśi sadāsannihitakusuma phalaiḥ tālatilakatamālahintālavakulabahulaiḥ, elālatākulitanārikelakalāpaiḥ, ālolalodhralavalīlavaṅgapallavaiḥ, ullasatcūtareṇupaṭalaiḥ, alikulajhaṅkāramukharasahakāraiḥ, unmadakokilakulakalālāpakolāhalibhiḥ, utphullaketakīkusumamañjarīrajaḥpuñjapiñjaraiḥ, pūgīlatādolādhirūḍhavanadevataiḥ, tārakāvarṣamivādharmmavināśapiśunaṃ kusumanikaramanilacalitamanavaratamatidhavalamutsṛjadbhiḥ, saṃsaktapādapaiḥ kānanairupagūḍham, acakitapracalitakṛṣṇasāraśataśabalābhiḥ, utphullasthalakamalinīlohinībhiḥ, mārīcamāyāmṛgāvalūnaprarūḍhavīruddalābhiḥ, dāśarathicāpakoṭikṣatakandagarttaviṣamitatalābhiḥ, daṇḍakāraṇyasthalībhirupaśobhitaprāntam, āgṛhītasamitkuśakusumamṛdbhiḥ adhyayana mukharaśiṣyānugataiḥ sarvataḥ praviśadbhiḥ munibhiraśūnyopakaṇṭham, utkaṇṭhitaśikhaṇḍimaṇḍalaśrūyamāṇajalakalaśapūraṇadhvānam, anavaratājyāhutiprītaiścitrabhānubhiḥ saśarīrameva munijanamamaralokaṃ ninīṣubhiḥ, uddhūyamānadhūmalekhācchalenābaddhyamānasvargamārgagamanasāpānasetumivopalakṣyamāṇam, āsannavattinībhistapodhanasamparkādivāpagatakāluṣyābhiḥ, taraṅgaparamparāsaṃkrāntaravibimbapaṅktibhiḥ, tāpasadarśanāgatasaptarṣimālāvigāhyamānābhiriva, ativikacakumudavanamṛṣijanamupāsitumavatīrṇaṃ grahagaṇamiva niśāsūdvahantībhirdīrghikābhiḥ parivṛtam, anilāvanamitaśikharābhiḥ praṇamyamānamiva vanalatābhiḥ, anavaratamuktakusumairabhyarcyamānamiva pādapaiḥ, ābaddhapallavāñjalibhiḥ upāsyamānamiva viṭapaiḥ, uṭajājiraprakīrṇaśuṣyacchyāmākam, upasaṃgṛhītāmalakalavalīlavaṅgakarkandhūkadalīlakucacūtapanasatālaphalam, adhyayanamukharavaṭujanam, anavarataśravaṇagṛhītavaṣaṭakāravācālaśukakulam, anekasārikodghuṣyamāṇasubrahmaṇyam, araṇyakukkuṭopabhujyamānavaiśvadevavalipiṇḍam, āsannavāpīkalahaṃsapotabhujyamānanīvāravalim, eṇījihvāpallavopalihyamānamunibālakam, agnikāryyārddhadagdhasimasimāyamānakuśasamitkusumam, upalabhagnanārikelarasasnigdhaśilātalam, acirakṣuṇṇavalkalarasapāṭalabhūtalam, raktacandanopaliptādityamaṇḍalanihitakaravīrakusumam, itastato vikṣiptabhasmalekhālaṅkṛtamunijanabhojanabhūmibhāgam, paricitaśākhāmṛgakarākṛṣṭayaṣṭiniṣkāśyamānajaradandhatāpasam, ibhakarabhakārddhopabhuktapatitaiḥ sarasvatībhujalatāvigalitaiḥ śaṅkhavalayairiva mṛgālaśakalaiḥ kalmāṣitam, ṛṣijanārthameṇakairviṣāṇaśikharotkhanyamānavividhakandamūlam, ambupūrṇapuṣkarapuṭairvanakaribhirāpūryyamāṇaviṭapālavālakam, ṛṣikumārakākṛṣyamāṇavanavarāhadaṃṣṭrāntarālalagnaśālūkam, upajātaparicayaiḥ kalāpibhiḥ pakṣapuṭapavanasandhukṣyamāṇa munihomahutāśanam, ārabdhāmṛtacarucārugandham, arddhapakvapuroḍāśapuṇyaparimalāmoditam, avicchinnājyadhārāhutihutabhughuṅkāramukharitam, upacaryyamāṇātithivargam, pūjyamānapitṛdaivatam, arcyamāna hariharapitāmaham, upadiśyamānaśrāddhakalpam, vyākhyāyamānayajñavidyam, ālocyamānadharmmaśāstram, paṭhyamānavividhapustakam, vicāryyamāṇasakalaśāstrārtham, ārabhyamāṇaparṇaśālam, upalipyamānājiram, upamṛjyamānoṭajābhyantaram, ābadhyamānadhyānam, sādhyamānamantram, abhyasyamānayogam, upahriyamāṇavanadevatāvalim, nirvarttyamānamauñjamekhalam, prakṣālyamānavalkalam, upasaṃgṛhyamāṇasamidham, saṃskriyamāṇakṛṣṇājinam, gṛhyamāṇagavedhukam, śoṣyamāṇapuṣkarabījam, grathyamānākṣamālam, gṛhyamāṇatripuṇḍrakam, nyasyamānavetradaṇḍam, āpūryyamāṇakamaṇḍalum, adṛṣṭapūrvaṃ kalikālasya, aparicitamanṛtasya, aśrutapūrvamanaṅgasya, abjayonimiva tribhuvanavanditam, asurārimiva prakaṭitavarāhanarasiṃharūpam, sāṃkhyamiva kapilādhiṣṭhitam, mathuropavanamiva balāvalīḍhadarpitadhenukam, udayanamivānanditavatsakulam, kimpuruṣādhirājyamiva munijanagṛhītakalaśābhiṣicyamānadrumam, nidāghasamayāvasānamiva āsannajalaprapātam, jaladharasamayamiva vanagahanamadhyasukhasuptaharim, hanūmantamivaśilāśakalaprahārasañcūṇitākṣāsthisañcayam, khāṇḍavavināśodyatārjunamiva prārabdhāgnikāryyam, surabhivilepanadharamapi satatāvirbhūtadhūmagandham, mātaṅgakulādhyāsitamapi pavitram, ullasitadhūmaketuśatamapi praśāntopadravam, paripūrṇadvijapatimaṇḍalasanāthamapi sadāsannihitatarugahanāndhakāram, atiramaṇīyamaparamiva brahmalokamāśramamapaśyam / | | kad pb1.187 | yatra ca malinatā havirdhūmeṣu na cariteṣu, mukharāgaḥ śukeṣu na kopeṣu, tīkṣṇatā kuśāgreṣu na svabhāveṣu, cañcalatā kadalīdaleṣu na manaḥsu, cakṣūrāgaḥ kokileṣu na parakalatreṣu, kaṇṭhagrahaḥ kamaṇḍaluṣu na surateṣu, mekhalābandho vrateṣu nerṣyākalaheṣu, stanasparśī homadhenuṣu na vanitāsu, pakṣapātaḥ kṛkavākuṣu na vidyāvivādeṣu, bhrāntiranakapradakṣiṇeṣu, na śāstreṣu, vasusaṅkīrttanaṃ divyakathāsu na tṛṣṇāsu, gaṇanā rudrākṣavalayeṣu na śarīreṣu, munibālanāśaḥ kratudīkṣayā na mṛtyunā, rāmānurāgo rāmāyaṇena na yauvanena, mukhabhaṅgavikāro jarayā na dhanābhimānena / | | kad pb1.188 | yatra ca mahābhārate śakunivadhaḥ, purāṇe vāyupralapatim, vayaḥpariṇāme dvijapatanam, upavanacandaneṣu jāḍyam, agnīnāṃ bhūtimattvam, eṇakānāṃ gītaśravaṇavyasanam, śikhaṇḍināṃ nṛtyapakṣapātaḥ, bhujaṅgamānāṃ bhogaḥ, kapīnāṃ śrīphalābhilāṣaḥ, mūlānāmadhogatiḥ / | | kad pb1.193 | avalokya cāhamacintayam ?? 'aho prabhāvastapasām! iyamasya śāntāpi mūrttiruttaptakanakāvadātā parisphurantī saudāminīva cakṣuṣaḥ pratihanti tejāṃsi, satatamudāsīnāpi mahāprabhāvatayā bhayamivopajanayati prathamopagatasya śuṣkanalakāśakusumanipatitānalacaṭulavṛttinityamasahiṣṇutapasvināṃ pratanutapasāmapi tejaḥprakṛtyā duḥsahaṃ bhavati, kimuta sakalabhuvanavanditacaraṇānāmanavaratatapaḥsalilakṣālitamalānāṃ karakamalatalāmalakaphalavadakhilaṃ jagadālokayatāṃ divyena cakṣuṣā bhagavatāmevaṃvidhānāmaghakṣayakāriṇām / | | kad pb1.211 | eṣa pravāhaḥ karuṇārasasya, santaraṇasetuḥ saṃsārasindhoḥ ādhāraḥ kṣamāmbhasāma, paraśustṛṣṇālatāgalanasya, sāgaraḥ santoṣāmṛtarasasya, upadeṣṭā siddhimārgasya, astagirirasadgrahasya mūlamupaśamataroḥ, nābhiḥ prajñācakrasya, prāsādodharmmadhvajasya, tīrthaṃ sarvavidyāvatārāṇām, vaḍavānalo lobhārṇavasya, nikaṣopalaḥ śāstraratnānāṃ, dāvānalo rāgapallavasya, mahāmantraḥ krodhabhujaṅgasya, divasakaro mohāndhakārasya, argalabandho narakadvārāṇām, kulabhavanamācārāṇām, āyatanaṃ maṅgalānām, abhūmirmadavikārāṇām, darśakaḥ satpathānām, utpattiḥ sādhutāyāḥ, nemirutsāhacakrasya, āśrayaḥ sattvasya, vipakṣaḥ kalikālasya, kośastapasaḥ, sakhā satyasya, kṣetramārjavasya, prabhavaḥ puṇyasañcayasya, adattāvakāśo matsarasya, arātirvipatteḥ, asthānaṃ paribhūteḥ, ananukūlo'bhimānasya, asammato dainyasya, anāyatto roṣasya, anabhimukhaḥ sukhānām / | | kad pb1.224 | tadyāvadayamaprarūḍhapakṣatirakṣamo'ntarīkṣamutpatitum, tāvadatraiva kasmiṃścidāśramatarukoṭare munikumārakairasmābhiścopanītena nīvārakaṇanikareṇa vividhaphalarasena ca saṃvarddhyamāno dhārayatu jīvitam / | | kad pb1.226 | udbhinnapakṣatistu gaganatalasañcaraṇasamartho yāsyati yatrāsmai rociṣyate / | | kad pb1.257 | śanaiḥ śaneśca dūrodite bhagavati himasruti sudhādhūlipaṭaleneva dhavalīkṛte candrātapena jagati, avaśyāyajalabindumandagatiṣu vighaṭamānakumudavanakaṣāyaparimaleṣu samupoḍhanidrābharālasatārakairanyonyaprathitapakṣapuṭairārabdharomanthamantharamukhaiḥ sukhāsīnairāśramamṛgairabhinanditāgamaneṣu pravahatsu niśāmukhasamīraṇeṣu, arddhayāmamātrāvakhaṇḍitāyāṃ vibhāvaryyām, hārītaḥ kṛtāhāraṃ māmādāya sarvaistaiḥ saha munibhiḥ upasṛtya candrātapodbhāsite tapovanaikadeśe vetrāsane sukhopaviṣṭam anatidūravirttinā jālapādanāmnā śiṣyeṇa darbhapavitradhavitrapāṇinā mandamandam upavījyamānaṃ pitaramavocat 'he tāta! sakaleyamāścaryyaśravaṇakutūhalākalitahṛdayā samupasthitā tāpasapariṣadābaddhamaṇḍalā pratīkṣate vyapanītaśramaśca kṛto'yaṃ patattripotaḥ, tadāvedyatāṃ yadanena kṛtamanyasmin janmani ko vā'yamabhūdbhaviṣyati ve'ti / | | kad pb1.261 | asti sakalatribhuvanalalāmabhūtā, prasavabhūmiriva kṛtayugasya, ātmanivāsocitā bhagavatā mahākālābhidhānena bhuvanatrayasargasthitisaṃhārakāraṇena pramathanāthenāpareva pṛthivī samutpāditā, dvitīyapṛthivīśaṅkayā ca jalanidhineva rasātalagabhīreṇa parikhāvalayena parivṛtā, paśupatinivāsaprītya ca gaganaparisarollekhiśikharamālena kailāsagiriṇeva sudhāsitena prākāramaṇḍalena parigatā, prakaṭaśaṅkhaśuktimuktāprabālamarakatamaṇirāśibhiścāmīkaracūrṇasikatānikaranicitairāyāmibhiragastyaparipītasalilaiḥ sāgarairiva mahāvipaṇipathairupaśobhitā, surāsurasiddhagandharvavidyādharoragādhyāsitābhiścitraśālābhiraviratotsavapramadāvalokanakutūhalādambaratalādavatīrṇābhirdivyavimānapaṅktibhirivālaṅkṛtā, mathanoddhatadugdhadhavalitamandaradyutibhiḥ kanakamayāmalakalaśaśikharairaniladolāyitasitadhvajairuparipatadabhragaṅgairiva tuṣāragiriśisvarairamaramandirairvirājitaśṛṅgāṭakā, sudhāvedikopaśobhitodapānairanavaratacalitajalaghaṭīyantrasicyamānaharitopavanāndhakāraiḥ ketakīdhūlidhūsarairupaśalyakairupaśobhitā, madamukharamadhukarapaṭalāndhakāritaniṣkuṭā, sphuradupavanalatākusumaparimalasurabhisamīraṇā, raṇitasaubhāgyaghaṇṭairālohitāṃśukapatākairābaddharaktacāmarairvidrumamayaiḥ pratibhavanam ucchritairmakarāṅkitaiḥ madanayaṣṭiketubhiḥ prakāśitamakaradhvajapūjā, satatapravṛttādhyayanadhvanidhautakalmaṣā, stimitamurajaravagambhīragarjiteṣu salilaśīkarāsāraracitadurddineṣu paryyastaravikiraṇaracitasuracāpacāruṣu dhārāgṛheṣu mattamayūramaṇḍalairmaṇḍalīkṛtaśikhaṇḍaistāṇḍavavyasanibhirābadhyamānakekāravakolāhalā, vikacakuvalayakāntairutphullakumudadhavalodarairanimiṣadarśanaramaṇīyairākhaṇḍalalocanairiva sahasrasaṃkhyairudbhāsitā sarobhiḥ, aviralakadalīvanakalitābhiramṛtaphenapuñjapāṇḍurābhirdiśi diśi dantavalabhikābhirdhavalīkṛtā, yauvanamadamattamālavīkucakalaśakṣubhitasalilayā bhagavato mahākālasya śirasi surasariamālokya samupajāterṣyayeva satatābaddhataraṅgabhrukuṭīlekhayā khamiva kṣālayantyā śiprayā parikṣiptā, sakalabhuvanakhyātayaśasā harajaṭācandreṇeva koṭisāreṇa mainākenevāviditapakṣapātena mandākinīpravāheṇeva prakaṭitakanakapadmarāśinā smṛtiśāstreṇeva sabhāvasathakūpaprapārāmasurasadanasetuyantrapravarttakena mandareṇevoddhṛtasamastasāgararatnasāreṇa saṃgṛhītagāruḍenāpi bhujaṅgabhīruṇā, khalopajīvinā'pi praṇayijanopajīvyamānavibhavena, vīreṇāpi vinayavatā, priyaṃvadenāpi satyavādinā, abhirūpeṇāpi svadārasantuṣṭena, atithijanābhyāgamārthināpi paraprārthanānabhijñena, kāmārthapareṇāpi dharmmapradhānena, mahāsattvenāpi paralokabhīruṇā, sakalavijñānaviśeṣavidā vadānyena, dakṣeṇa smitapūrvābhibhāṣiṇā parihāsapeśalena, ujjvalaveśena śikṣitāśeṣadeśabhāṣeṇa vakroktinipuṇena ākhyāyikākhyānaparicaya catureṇa sarvalipijñena mahābhāratapurāṇarāmāyaṇānurāgiṇā bṛhatkathākuśalena dyūtādikalākalāpapārageṇa śrutarāgiṇā subhāṣitavyasaninā praśāntena surabhimāsamāruteneva satatadakṣiṇena, himagirikānanenevāntaḥsaralena, lakṣmaṇeneva rāmārādhananipuṇena, śatrughnenevāviṣkṛtabharataparicayena, divaseneva mitrānuvarttinā, baudheneva sarvāstivādaśūreṇa, sāṃkhyāgameneva pradhānapuruṣopetena, jinadharmmeṇeva jīvānukampinā, vilāsijanenādhiṣṭhitā, saśaileva prāsādaiḥ, saśākhānagareva mahābhavanaiḥ, sakalpavṛkṣeva satpuruṣaiḥ, darśitaviśvarūpeva citrabhittibhiḥ, sandhyeva padmarāgānurāgiṇī, amarādhipamūrttiriva makhaśatānaladhūmapūtā, paśupatilāsyakrīḍeva sudhādhavalāṭṭahāsā, vṛddheva jātarūpakṣayā, garuḍamūrttirivācyutasthitiramaṇīyā, prabhātaveleva prabuddhasarvalokā, śabaravasatirivāvalambitacārucāmaranāgadantadhavalagṛhā, śeṣatanuriva sadāsannavasudhādharā, jaladhimathanaveleva mahāghoṣapūritadigantarā, prastutābhiṣekabhūmiriva sannihitakanakaghaṭasahasrā, gaurīva mahāsiṃhāsanocitamūrttiḥ, aditiriva devakulasahasrasevyā, mahāvarāhalīleva darśitahiraṇyākṣapātā, āstīkatanuriva ānanditabhujaṅgalokā, harivaṃśakatheva anekabālakrīḍāramaṇīyā, prakaṭāṅganopabhogāpyakhaṇḍitacaritrā, raktavarṇāpi sudhādhavalā, avalambitamuktākalāpāpi vihārabhūṣaṇā, bahuprakṛtirapi sthirā, vijitāmaraloka dyutiravantīṣūjjayinī nāma nagarī / | | kad pb1.271 | tasyāñcaivaṃvidhāyāṃ nagaryyāṃ nalanahuṣayayātidhundhumārabharatabhagīrathadaśarathapratimaḥ, bhujabalārjitabhūmaṇḍalaḥ, phalitaśaktitrayaḥ, matimān, utsāhasampannaḥ, nītiśāstrākhinnabuddhiḥ, adhītadharmaśāstraḥ, tṛtīya iva tejasā kāntyā ca sūryyācandramasoḥ, anekasaptatantupūtamūrttiḥ, upaśamitasakalajagadupaplavaḥ, vihāya kamalavanāni, avagaṇayya nārāyaṇavakṣaḥ sthalavasatisukham, utphullāravindahastayā śūrasamāgamavyasaninyā nirvyājamāliṅgito lakṣmyā, mahāmunijanasaṃsevitasya madhusūdanacaraṇa iva surasaritpravāhasya prabhavaḥ satyasya, | | kad pb1.272 | śiśirasyāpi ripujanasantāpakāriṇaḥ sthirasyāpyavirataṃ bhramataḥ, nirmmalasyāpi malinīkṛtārātivanitāmukhakamaladyuteḥ, atidhavalasyāpi sarvajanarāgakāriṇaḥ, sudhāsūteriva jalanidhirudbhavo yaśasaḥ, pātālavadāśrito nijapakṣakṣatibhītaiḥ kṣitibhṛtāṃ kulaiḥ, grahagaṇa iva budhānugataḥ, makaradhvaja ivotsannavigrahaḥ, daśaratha iva sumitroṣetaḥ, paśupatiriva mahāsenānuyātaḥ, bhujagarāja iva kṣamābharaguruḥ, narmmadāpravāha iva mahāvaṃśaprabhavaḥ, avatāra iva dharmmasya, pratinidhiriva puruṣottamasya, parihṛtaprajāpīḍo rājā tārāpīḍo nāmābhūt / | | kad pb1.282 | yasmiṃśca rājani girīṇāṃ vipakṣatā, pratyayānāṃ paratvam, darpaṇānāmabhimukhāvasthānam, śūlapāṇipratimānāṃ durgāśleṣaḥ, jaladharāṇāṃ cāpadhāraṇam, pratīhārāṇāmasidhāraṇam, taikṣṇyamasidhārāṇām, dhvajānāmunnatiḥ, dhanuṣāmavanatiḥ, vaśānāṃ śilīmukhakṣatiḥ, devatānāṃ yātrākusumānāṃ bandhanasthitiḥ, indriyāṇāṃ nigrahaḥ, vanakariṇāṃ vāripraveśaḥ, vratināmagnidhāraṇam, grāhāṇāṃ tulārohaṇam, agastyodaye viṣaśuddhiḥ, keśanakhānāmāyatibhaṅgaḥ, jaladharadivasānāṃ malināmbaratvam, ratnopalānāṃ bhedaḥ, munīnāṃ yogasādhanam, kumārastutiṣu tārakoddharaṇam, uṣṇaraśmergrahaṇāśaṅkā śaśino jyeṣṭhātikramaḥ, mahābhārate duḥśāsanāparādhākarṇanam, vayaḥpariṇāme daṇḍagrahaṇam, asiparivāreṣu kalaṅkayogaḥ, kāminīkucapatrabhaṅgeṣu vakratā, kariṇāṃ dānavicchittiḥ, akṣakrīḍāsu śūnyagṛhadarśanam, pṛthivyāmāsīt / | | kad pb1.283 | tasya ca rājñaḥ nikhilaśāstrakalāvagāhagambhīrabuddhiḥ, ā śaiśavādupārūḍhanirbharapremarasaḥ, nītiśāstraprayogakuśalaḥ, bhuvanarājyabhāranaukarṇadhāraḥ, mahatsvapi kāryyasaṅkaṭeṣvaviṣaṇṇadhīḥ, dhāma dhairyyasya, sthānaṃ sthiteḥ, sindhuḥ satyasya, gururguṇānām, ācāryya ācārāṇām, dhātā dharmmasya, śeṣāhiriva sakalamahībhāradhāraṇakṣamaḥ, salilanidhiriva mahāsattvanivāsaḥ, jarāsandha iva ghaṭitasandhivigrahaḥ, tryambaka iva prasādhitadurgaḥ, yudhiṣṭhira iva dharmmaprabhabaḥ, sakalavedavedāṅgavit, aśeṣarājyamaṇḍalamaṅgalaikasāraḥ, bṛhaspatiriva sunāsīrasya, kaviriva vṛṣaparvaṇaḥ, vaśiṣṭha iva daśarathasya, viśvāmitra iva rāmasya, dhaumya ivājātaśatroḥ, damanaka iva bhīmasya, sumatiriva nalasya, sarvakāryoṣvāhitamatiḥ, amātyo brāhmaṇaḥ śukanāso nāmāsīt / | | kad pb1.284 | yā narakāsuraśastraprahārabhīṣaṇe bhramanmandaranitambanirddayaniṣpeṣakaṭhināṃsaṣīṭhe nārāyaṇavakṣaḥsthale'pi sthitāmaduṣkaralābhāmamanyata prajñābalena lakṣmīm / | | kad pb1.288 | praśamitāśeṣavipakṣatayā vigatāśaṅkaḥ śithi līkṛtavasundharāvyāpāraḥ prāyaśo yauvanasukhamanubabhūva / |
|
