| kad pb1.117 | tasya caivaṃvidhasya sampratyapi prakaṭopalakṣyamāṇapūrvavṛttāntasyāgastyāśramasya nātidūre jalanidhipānakupitavaruṇotsāhitena agastyamatsarāttadāśramasamīpavarttyaparā iva vedhasā mahājalanidhirutpāditaḥ, pralayakālavighaṭitāṣṭadigbhāgasandhibandhaṃ gaganatalamiva bhuvi nipatitam, ādivarāhasamuddhṛtadharāmaṇḍalasthānamiva salilapūritam, anavaratamajjadunmadaśabarakāminīkucakalasalulitajalam, utphullakumudakuvalayakahlāram, unnidrāravindamadhubindubaddhacandrakam, alikulapaṭalāndhakāritasaugandhikam, sārasitasamadasārasam, amburuhamadhupānamattakalahaṃsakāminīkṛtakolāhalam, anekajalacarapataṅgaśatasañcalanacalitavācālavīcimālam, anilollāsitakallolaśiśiraśīkarārabdhaduddinam, aśaṅkitāvatīrṇābhirambhaḥkrīḍārāgiṇībhiḥ snānasamaye vanadevatābhiḥ keśapāśakusumaiḥ surabhīkṛtam, ekadeśāvatīrṇamunijanāpūryyamāṇakamaṇḍalukalajaladhvanimanoharam, unmiṣadutpalavanamadhyacāribhiḥ savarṇatayā rasitānumeyaiḥ kādambakadambakairāsevitam, abhiṣekāvatīrṇapulindarājasundarīkucacandanadhūlidhavalitataraṅgam, upāntajātaketakīrajaḥpaṭalabaddhakūlapulinam, āsannāśramāgatatāpasakṣalitārdravalkalakaṣāyapāṭalataṭajalam, upataṭaviṭapi pallavānilavījitam, aviralatamālavīthikāndhakāritābhiḥ vālinirvāsitena saṃcaratā pratidinamṛṣyamūkavāsinā sugrīveṇāvaluptaphalalaghulatābhiḥ, udavāsitāpasānāṃ devatārccanopayuktakusumābhiḥ | | kad pb1.120 | tasyaiva padmasarasaḥ paścime tīre rāghavaśaraprahārajarjaritajīrṇatālataruṣaṇḍasya ca samīpe diggajakaradaṇḍānukāriṇā jaradajagareṇa satatamāveṣṭitamūlatayā baddhamahālavāla iva tuṅgaskandhāvalambibhiranilavellitairahinirmmokairdhṛtottarīya iva dikcakravālaparimāṇamiva gṛhṇatā bhuvanāntarālaviprakīrṇena śākhāsaṃcayena pralayakālatāṇḍavaprasāritabhujasahasramuḍupatiśekharamiva viḍambayitumudyataḥ, purāṇatayā patanabhayādiva vāyuskandhalagnaḥ nikhilaśarīravyāpinībhiratidūronnatābhirjīrṇatayā śirābhiriva parigato vratatibhiḥ, jarātilakabindubhiriva kaṇṭakairācitatanuḥ itastataḥ paripītasāgarasalilairgaganāgataiḥ patrarathairiva śākhāntareṣu nilīyamānaiḥ kṣaṇamambubhārālasairārdrīkṛtapallavairjaladharapaṭalairapyadṛṣṭaśikharaḥ, tuṅgatayā nandanavanaśriyamivāvalokayitumabhyadyataḥ, svasamīpavarttināmupari saṃcaratāṃ gaganatalagamanakhedāyāsitānāṃ ravirathaturaṅgamāṇāṃ sṛkkaparisrutaiḥ phenapaṭalaiḥ sandehitatūlarāśibhirdhavalīkṛtaśikharaśākhaḥ, vanagajakapolakaṇḍūyanalagnamadanilīnamattamadhukaramālena lohaśṛṅkhalābandhananiścaleneva kalpasthāyinā mūlena samupetaḥ, koṭarābhyantaraniviṣṭaiḥ sphuradbhiḥ sajīva iva madhukarapaṭalaiḥ, duryyodhana ivopalakṣitaśakunipakṣapātaḥ, nalinanābha iva vanamālopagūḍhaḥ, navajaladharavyūha iva nabhasi daśitonnatiḥ, akhilabhuvanatalāvalokanaprāsāda iva vnadevatānām, adhipatiriva daṇḍakāraṇyasya, nāyaka iva sarvavanaspatīnām, sakheva vindhyasya, śākhābāhubhirupaguhyeva vindhyāṭavīmavasthito mahān jīrṇaḥ śālmalīvṛkṣaḥ / | | kad pb1.130 | ekadā tu prabhātasandhyārāgalohite gagane ca kamalinīmadhuraktapakṣasampuṭe vṛddhahaṃsa iva mandākinīpulinādaparajalanidhitaṭamavatarati candramasi, pariṇataraṅkuromapāṇḍuni vrajati viśālatāmāśācakravāle, gajarudhiraraktaharisaṭālohinībhiḥ prataptalākṣikatantu pāṭalābhirāyāminībhiḥ aśiśirakiraṇadīdhitibhiḥ padmarāgaśalākāsammārjanībhiriva samutsāryyamāṇe gaganakuṭṭimakusumaprakare tārāgaṇe, sandhyāmupāsitumuttarāśāvalambini mānasasarastīramivāvatarati saptarṣimaṇḍale, taṭagatavighaṭitaśuktisampuṭaviprakīrṇamaruṇakarapreraṇādhogalitamuḍugaṇamiva muktāphalanikaramudvahati dhavalitapulinamudanvati pūrvetare, tuṣārabinduvarṣiṇi vibuddhaśikhikule vijṛmbhamāṇakeśariṇi kariṇīkadambakaprabodhyamānasamadakariṇi kṣapājalajaḍakeśaraṃ kusumanikaramudayagiriśikharasthitaṃ savitāramivoddiśya pallavāñjalibhiḥ samutsṛjati kānane, rāsabharomadhūsarāsu vanadevatāprāsādānāṃ tarūṇāṃ śikhareṣu pārāvatamālāyamānāsu dharmmapatākāsviva samunmiṣantīṣu tapovanāgnihotradhūmalekhāsu, avaśyāyaśīkariṇi lulitakamalavane ratikhinnaśabarasīmantinīsvedajalakaṇāpahāriṇi vanamahiṣaromanthaphenabinduvāhini calitapallavalatālāsyopadeśavyasanini vighaṭamānakamalakhaṇḍamadhuśīkarāsāravarṣiṇi kusumāmodatarpitālijāle niśāvasānajātajaḍimni mandamandasañcāriṇi pravāti prābhātike mātariśvani, kamalavanaprabodhamaṅgalapāṭhakānām ibhagaṇḍaḍiṇḍimānāṃ madhulihāṃ kumudodareṣu vighaṭamānadalapuṭaniruddhapakṣasaṃhatīnāmuccaratsu huṅkāreṣu, prabhātaśiśiramārutāhatamuttaptajaturasāśliṣṭaṃ pakṣmamālamiva saśeṣanidrājihmitatāraṃ cakṣurunmīlayatsu śanaiḥ śanairūṣaraśayyādhūsarakroḍaromarājiṣu vanamṛgeṣu, itastataḥ, sañcaratsu vanacareṣu, vijṛmbhamāṇe śrotrahāriṇi pampāsaraḥkalahaṃsakolāhale samullasati narttitaśikhaṇḍimaṇḍale manohare vanagajakarṇatālaśabde, krameṇa ca gaganatalamavatarato divasakaravāraṇasyāvacūḍacāmarakalāpa ivopalakṣyamāṇe mañjiṣṭārāgalohite kiraṇajāle, śanaiḥ śanairudite bhagavati savitari, pampāsaraḥ paryyantataruśikharasañcāriṇi adhyāsitagiriśikhare divasakarajanmani hṛtatārepunariva kapīśvare vanamabhiyatati bālātape, spaṣṭe jāte pratyūṣasi, nacirādiva divasāṣṭāmabhāgabhāji spaṣṭabhāsi bhāsvati bhūte, prayāteṣu yathābhimatāni digantarāṇi śukakuleṣu, kulāyanilīnanibhṛtaśukaśāvakasanāthe'pi niḥśabdatayā śūnya iva tasmin vanaspatau, svanīḍāvasthita eva tāte, mayi ca śaiśavādasañjātabale samudbhidyamānapakṣapuṭe pituḥsamīpavarttini koṭaragate, sahasaiva tasmin mahāvane saṃtrāsitasakalavanacaraḥ sarabhasamutpatatpatatripakṣapuṭasantataḥ bhīakaripotacītkārapīvaraḥ pracalitamattālikulakvaṇitamāṃsalaḥ paribhramaduddhoṇavanavarāharavaghargharaḥ giriguhāsuptaprabuddhasiṃhanādopabṛṃhitaḥ, kampayanniva tarūn bhagīrathāvatāryyamāṇagaṅgāpravāhakalakalabahalo bhītavanadevatākarṇito mṛgayākolāhaladhvanirudacarat / | | kad pb1.150 | asāvapi pāpaḥ krameṇa śākhāntaraiḥ sañcaramāṇaḥ koṭaradvāramāgatya jīrṇāsitabhujaṅgabhogabhīṣaṇaṃ prasāryya vividhavanavarāhavasāvisragandhikaratalam anavaratakodaṇḍaguṇākarṣaṇavraṇāṅkitaprakoṣṭham antakadaṇḍānukāriṇaṃ vāmabāhumatinṛśaṃso muhurmuhurdattacañcaprahāramutkūjantamākṛṣya tātamapagatāsumakarot / | | kad pb1.185 | āgṛhītadhautadhavalavalkalaśca sajyotsna iva sandhyātapaḥ karatalanirdhūnanaviśadasaṭaḥ pratyagrasnānārdrajaṭena sakalena tena munikumārakadambakenānugamyamāno māṃ gṛhītvā tapovanābhimukhaṃ śanaiḥ śanairagacchat / | | kad pb1.186 | anatidūramiva gatvā diśi diśi sadāsannihitakusuma phalaiḥ tālatilakatamālahintālavakulabahulaiḥ, elālatākulitanārikelakalāpaiḥ, ālolalodhralavalīlavaṅgapallavaiḥ, ullasatcūtareṇupaṭalaiḥ, alikulajhaṅkāramukharasahakāraiḥ, unmadakokilakulakalālāpakolāhalibhiḥ, utphullaketakīkusumamañjarīrajaḥpuñjapiñjaraiḥ, pūgīlatādolādhirūḍhavanadevataiḥ, tārakāvarṣamivādharmmavināśapiśunaṃ kusumanikaramanilacalitamanavaratamatidhavalamutsṛjadbhiḥ, saṃsaktapādapaiḥ kānanairupagūḍham, acakitapracalitakṛṣṇasāraśataśabalābhiḥ, utphullasthalakamalinīlohinībhiḥ, mārīcamāyāmṛgāvalūnaprarūḍhavīruddalābhiḥ, dāśarathicāpakoṭikṣatakandagarttaviṣamitatalābhiḥ, daṇḍakāraṇyasthalībhirupaśobhitaprāntam, āgṛhītasamitkuśakusumamṛdbhiḥ adhyayana mukharaśiṣyānugataiḥ sarvataḥ praviśadbhiḥ munibhiraśūnyopakaṇṭham, utkaṇṭhitaśikhaṇḍimaṇḍalaśrūyamāṇajalakalaśapūraṇadhvānam, anavaratājyāhutiprītaiścitrabhānubhiḥ saśarīrameva munijanamamaralokaṃ ninīṣubhiḥ, uddhūyamānadhūmalekhācchalenābaddhyamānasvargamārgagamanasāpānasetumivopalakṣyamāṇam, āsannavattinībhistapodhanasamparkādivāpagatakāluṣyābhiḥ, taraṅgaparamparāsaṃkrāntaravibimbapaṅktibhiḥ, tāpasadarśanāgatasaptarṣimālāvigāhyamānābhiriva, ativikacakumudavanamṛṣijanamupāsitumavatīrṇaṃ grahagaṇamiva niśāsūdvahantībhirdīrghikābhiḥ parivṛtam, anilāvanamitaśikharābhiḥ praṇamyamānamiva vanalatābhiḥ, anavaratamuktakusumairabhyarcyamānamiva pādapaiḥ, ābaddhapallavāñjalibhiḥ upāsyamānamiva viṭapaiḥ, uṭajājiraprakīrṇaśuṣyacchyāmākam, upasaṃgṛhītāmalakalavalīlavaṅgakarkandhūkadalīlakucacūtapanasatālaphalam, adhyayanamukharavaṭujanam, anavarataśravaṇagṛhītavaṣaṭakāravācālaśukakulam, anekasārikodghuṣyamāṇasubrahmaṇyam, araṇyakukkuṭopabhujyamānavaiśvadevavalipiṇḍam, āsannavāpīkalahaṃsapotabhujyamānanīvāravalim, eṇījihvāpallavopalihyamānamunibālakam, agnikāryyārddhadagdhasimasimāyamānakuśasamitkusumam, upalabhagnanārikelarasasnigdhaśilātalam, acirakṣuṇṇavalkalarasapāṭalabhūtalam, raktacandanopaliptādityamaṇḍalanihitakaravīrakusumam, itastato vikṣiptabhasmalekhālaṅkṛtamunijanabhojanabhūmibhāgam, paricitaśākhāmṛgakarākṛṣṭayaṣṭiniṣkāśyamānajaradandhatāpasam, ibhakarabhakārddhopabhuktapatitaiḥ sarasvatībhujalatāvigalitaiḥ śaṅkhavalayairiva mṛgālaśakalaiḥ kalmāṣitam, ṛṣijanārthameṇakairviṣāṇaśikharotkhanyamānavividhakandamūlam, ambupūrṇapuṣkarapuṭairvanakaribhirāpūryyamāṇaviṭapālavālakam, ṛṣikumārakākṛṣyamāṇavanavarāhadaṃṣṭrāntarālalagnaśālūkam, upajātaparicayaiḥ kalāpibhiḥ pakṣapuṭapavanasandhukṣyamāṇa munihomahutāśanam, ārabdhāmṛtacarucārugandham, arddhapakvapuroḍāśapuṇyaparimalāmoditam, avicchinnājyadhārāhutihutabhughuṅkāramukharitam, upacaryyamāṇātithivargam, pūjyamānapitṛdaivatam, arcyamāna hariharapitāmaham, upadiśyamānaśrāddhakalpam, vyākhyāyamānayajñavidyam, ālocyamānadharmmaśāstram, paṭhyamānavividhapustakam, vicāryyamāṇasakalaśāstrārtham, ārabhyamāṇaparṇaśālam, upalipyamānājiram, upamṛjyamānoṭajābhyantaram, ābadhyamānadhyānam, sādhyamānamantram, abhyasyamānayogam, upahriyamāṇavanadevatāvalim, nirvarttyamānamauñjamekhalam, prakṣālyamānavalkalam, upasaṃgṛhyamāṇasamidham, saṃskriyamāṇakṛṣṇājinam, gṛhyamāṇagavedhukam, śoṣyamāṇapuṣkarabījam, grathyamānākṣamālam, gṛhyamāṇatripuṇḍrakam, nyasyamānavetradaṇḍam, āpūryyamāṇakamaṇḍalum, adṛṣṭapūrvaṃ kalikālasya, aparicitamanṛtasya, aśrutapūrvamanaṅgasya, abjayonimiva tribhuvanavanditam, asurārimiva prakaṭitavarāhanarasiṃharūpam, sāṃkhyamiva kapilādhiṣṭhitam, mathuropavanamiva balāvalīḍhadarpitadhenukam, udayanamivānanditavatsakulam, kimpuruṣādhirājyamiva munijanagṛhītakalaśābhiṣicyamānadrumam, nidāghasamayāvasānamiva āsannajalaprapātam, jaladharasamayamiva vanagahanamadhyasukhasuptaharim, hanūmantamivaśilāśakalaprahārasañcūṇitākṣāsthisañcayam, khāṇḍavavināśodyatārjunamiva prārabdhāgnikāryyam, surabhivilepanadharamapi satatāvirbhūtadhūmagandham, mātaṅgakulādhyāsitamapi pavitram, ullasitadhūmaketuśatamapi praśāntopadravam, paripūrṇadvijapatimaṇḍalasanāthamapi sadāsannihitatarugahanāndhakāram, atiramaṇīyamaparamiva brahmalokamāśramamapaśyam / | | kad pb1.192 | tatkṣaṇakṛtakusumopahāraramaṇīyasya nātimahataḥ parimaṇḍalatayā vistīrṇāvakāśasya raktāśokataroradhaśchāyāyāmupaviṣṭam, atyugratapobhirbhuvanamiva sāgaraiḥ kanakagirimiva kulācalaiḥ kratumiva vaitānavahnibhiḥ kalpāntadivasamiva ravibhiḥ, kālamiva kalpaiḥ, samantānmaharṣibhiḥ parivṛtam, ugraśāpabhītayeva kampitadehayā, praṇayinyeva vihitakeśagrahayā, kraddhayeva kṛtabhrūbhaṅgayā, mattayevākulitagamanayā, prasādhitayeva prakaṭitatilakayā jarayā, gṛhītavratayeva bhasmadhavalayā dhavalīkṛtavigraham, āyāminībhiḥ palitapāṇḍurābhiḥ tapasā vijitya munijanamakhilaṃ dharmmapatākābhirivocchritābhiḥ amaralokamāroḍhuṃ puṇyarajjubhirivopasaṃgṛhītābhiḥ atidūrapravṛddhasya tapastaroḥ kusumamañjarībhirivodgatābhirjaṭābhirupaśobhamānam, uparacitabhasmatripuṇḍrakeṇa tiryyakpravṛttatripathagāsrotastrayeṇa himagiriśilātaleneva lalāṭaphalakenopetam, adhomukhacandrakalākārābhyāmavalambitabaliśithilābhyāṃ bhrūlatābhyāmavaṣṭabhyamānadṛṣṭim, anavaratamantrābhyāsavivṛtādharapuṭayā niṣpatadbhiratiśucibhiḥ satyaprarohairiva svacchendriyavṛttibhiriva vidyāguṇairiva karuṇārasapravāhairiva daśanamayūkhairdhavalitapurobhāgam, udvamadamalagaṅgāpravāhamiva jahnum, anavaratasomodgārasugandhiniśvāsāvakṛṣṭairmūrttimadbhiriva śāpākṣaraiḥ sadā mukhabhāgasannihitaiḥ parisphuradbhiralibhiravirahitam, atikṛśatayā nimnataragaṇḍagarttam unnatatarahanughoṇam ākarālatārakam avaśīryyamāṇaviralanayanapakṣmamālam udgatadīrgharomaruddhaśravaṇavivaram ānābhilambitakūrccakalāpamānanamādadhānam, aticapalānāmindriyāśvānām antaḥsaṃyamanarajjubhirivātatābhiḥ kaṇṭhanāḍībhirnirantarāvanaddhakandharam samunnataviralāsthipañjaram, aṃsālambitadhavalayajñopavītam, anilavaśajanitatanu taraṅgabhaṅgam utplavamānanavamṛṇālamiva mandākinīpravāham, akaluṣamaṅgamudvahantam, amalasphaṭikaśakalaghaṭitamakṣāvalayamatyujjvalasthūlamuktāphalaprathitaṃ sarasvatīhāramiva caladaṅgulivivaragatamāvarttayantam, anavaratabhramitatārakācakramaparamiva dhruvam, unnamatā śirājālakena jaratkalpatarumiva pariṇatalatāsañcayena nirantaranicitam, amalena candrāṃśubhirivāmṛtaphenairiva guṇasantānatantubhiriva nirmmitena mānasasarojalakṣālanaśucinā dukūlavalkalena dvitīyeneva jarājālakena saṃcchāditam, āsannavarttinā mandākinīsalilapūrṇena tridaṇḍopaviṣṭena sphāṭikakamaṇḍalunā vikacapuṇḍarīkarāśimiva rājahaṃsenopaśobhamānam, sthairyeṇācalānāṃ gāmbhīryyeṇa sāgarāṇāṃ tejasā savituḥ praśamena tuṣāraraśmeḥ nirmmalatayā'mbaratalasya saṃvibhāgamiva kurvvāṇam, vainateyamiva svaprabhāvopāttasakaladvijādhipatyam, kamalāsanamivāśramagurum, jaraccandanatarumiva bhujaṅganirmmokadhavalajaṭākulam, praśastavāraṇamiva pralambakarṇabālam, bṛhaspatimivājanmavarddhitakacam, divasamivodyadarkavimbabhāsvaramukham, śaratkālamiva kṣīṇavarṣam, śantanumiva priyasatyavratam, ambikākaratalamiva rudrākṣagrahaṇanipuṇam, śiśirasamayasūryyamiva kṛtottarāsaṅgam, baḍavānalamiva satatapayobhakṣyam, śūnyanagaramiva dīnānāthavipannaśaraṇam, paśupatimiva bhasmapāṇḍuromāśliṣṭaśarīram, bhagavantaṃ jābālimapaśyam / | | kad pb1.203 | aho! mahāsattveyaṃ jarā, yāsya pralayaravikaranikaradurnirīkṣye rajanikarakiraṇapāṇḍuśiroruhe jaṭābhāre phenapuñjadhavalā gaṅgeva paśupateḥ kṣīrāhutiriva śikhākalāpe vibhāvasornipatantī na bhītā / | | kad pb1.217 | eṣa mṛṇālakalāpāśaṅkibhiḥ śaśikaradhavalaṃ saṭābhāram āmīlitalocano bahu manyate dviradakalabhairākṛṣyamāṇaṃ mṛgapatiḥ / | | kad pb1.246 | aciraproṣite ca savitari śokavidhurā kamalamukulakamaṇḍaludhāriṇī haṃsasitadukūlaparidhānā mṛṇāladhavalayajñopavītinī madhukaramaṇḍalākṣavalayam udvahantī kamalinī dinapatisamāgamavratamivācarat / | | kad pb1.252 | krameṇa ca ravirastaṃ gata ityudantamupalabhya jātavairāgyo dhautadukūlavalkaladhavalāmbaraḥ satārāntaḥpuraḥ, paryyantasthitatanutimiratamālavanalekham, saptarṣimaṇḍalādhyuṣitam, arundhatīsañcaraṇapavitram, upahitāṣāḍham, ālakṣyamāṇamūlam, ekāntasthitacārutārakamṛgam amaralokāśramamiva gaganatalam amṛtadīghitiradhyatiṣṭhat / | | kad pb1.253 | candrābharaṇabhṛtastārakākapālaśakalālaṅkṛtādambaratalāt vyambakottamāṅgādiva gaṅgā sāgaram āpūrayantī haṃsadhavalā dharaṇyāmapatajjyotsnā / | | kad pb1.257 | śanaiḥ śaneśca dūrodite bhagavati himasruti sudhādhūlipaṭaleneva dhavalīkṛte candrātapena jagati, avaśyāyajalabindumandagatiṣu vighaṭamānakumudavanakaṣāyaparimaleṣu samupoḍhanidrābharālasatārakairanyonyaprathitapakṣapuṭairārabdharomanthamantharamukhaiḥ sukhāsīnairāśramamṛgairabhinanditāgamaneṣu pravahatsu niśāmukhasamīraṇeṣu, arddhayāmamātrāvakhaṇḍitāyāṃ vibhāvaryyām, hārītaḥ kṛtāhāraṃ māmādāya sarvaistaiḥ saha munibhiḥ upasṛtya candrātapodbhāsite tapovanaikadeśe vetrāsane sukhopaviṣṭam anatidūravirttinā jālapādanāmnā śiṣyeṇa darbhapavitradhavitrapāṇinā mandamandam upavījyamānaṃ pitaramavocat 'he tāta! sakaleyamāścaryyaśravaṇakutūhalākalitahṛdayā samupasthitā tāpasapariṣadābaddhamaṇḍalā pratīkṣate vyapanītaśramaśca kṛto'yaṃ patattripotaḥ, tadāvedyatāṃ yadanena kṛtamanyasmin janmani ko vā'yamabhūdbhaviṣyati ve'ti / | | kad pb1.261 | asti sakalatribhuvanalalāmabhūtā, prasavabhūmiriva kṛtayugasya, ātmanivāsocitā bhagavatā mahākālābhidhānena bhuvanatrayasargasthitisaṃhārakāraṇena pramathanāthenāpareva pṛthivī samutpāditā, dvitīyapṛthivīśaṅkayā ca jalanidhineva rasātalagabhīreṇa parikhāvalayena parivṛtā, paśupatinivāsaprītya ca gaganaparisarollekhiśikharamālena kailāsagiriṇeva sudhāsitena prākāramaṇḍalena parigatā, prakaṭaśaṅkhaśuktimuktāprabālamarakatamaṇirāśibhiścāmīkaracūrṇasikatānikaranicitairāyāmibhiragastyaparipītasalilaiḥ sāgarairiva mahāvipaṇipathairupaśobhitā, surāsurasiddhagandharvavidyādharoragādhyāsitābhiścitraśālābhiraviratotsavapramadāvalokanakutūhalādambaratalādavatīrṇābhirdivyavimānapaṅktibhirivālaṅkṛtā, mathanoddhatadugdhadhavalitamandaradyutibhiḥ kanakamayāmalakalaśaśikharairaniladolāyitasitadhvajairuparipatadabhragaṅgairiva tuṣāragiriśisvarairamaramandirairvirājitaśṛṅgāṭakā, sudhāvedikopaśobhitodapānairanavaratacalitajalaghaṭīyantrasicyamānaharitopavanāndhakāraiḥ ketakīdhūlidhūsarairupaśalyakairupaśobhitā, madamukharamadhukarapaṭalāndhakāritaniṣkuṭā, sphuradupavanalatākusumaparimalasurabhisamīraṇā, raṇitasaubhāgyaghaṇṭairālohitāṃśukapatākairābaddharaktacāmarairvidrumamayaiḥ pratibhavanam ucchritairmakarāṅkitaiḥ madanayaṣṭiketubhiḥ prakāśitamakaradhvajapūjā, satatapravṛttādhyayanadhvanidhautakalmaṣā, stimitamurajaravagambhīragarjiteṣu salilaśīkarāsāraracitadurddineṣu paryyastaravikiraṇaracitasuracāpacāruṣu dhārāgṛheṣu mattamayūramaṇḍalairmaṇḍalīkṛtaśikhaṇḍaistāṇḍavavyasanibhirābadhyamānakekāravakolāhalā, vikacakuvalayakāntairutphullakumudadhavalodarairanimiṣadarśanaramaṇīyairākhaṇḍalalocanairiva sahasrasaṃkhyairudbhāsitā sarobhiḥ, aviralakadalīvanakalitābhiramṛtaphenapuñjapāṇḍurābhirdiśi diśi dantavalabhikābhirdhavalīkṛtā, yauvanamadamattamālavīkucakalaśakṣubhitasalilayā bhagavato mahākālasya śirasi surasariamālokya samupajāterṣyayeva satatābaddhataraṅgabhrukuṭīlekhayā khamiva kṣālayantyā śiprayā parikṣiptā, sakalabhuvanakhyātayaśasā harajaṭācandreṇeva koṭisāreṇa mainākenevāviditapakṣapātena mandākinīpravāheṇeva prakaṭitakanakapadmarāśinā smṛtiśāstreṇeva sabhāvasathakūpaprapārāmasurasadanasetuyantrapravarttakena mandareṇevoddhṛtasamastasāgararatnasāreṇa saṃgṛhītagāruḍenāpi bhujaṅgabhīruṇā, khalopajīvinā'pi praṇayijanopajīvyamānavibhavena, vīreṇāpi vinayavatā, priyaṃvadenāpi satyavādinā, abhirūpeṇāpi svadārasantuṣṭena, atithijanābhyāgamārthināpi paraprārthanānabhijñena, kāmārthapareṇāpi dharmmapradhānena, mahāsattvenāpi paralokabhīruṇā, sakalavijñānaviśeṣavidā vadānyena, dakṣeṇa smitapūrvābhibhāṣiṇā parihāsapeśalena, ujjvalaveśena śikṣitāśeṣadeśabhāṣeṇa vakroktinipuṇena ākhyāyikākhyānaparicaya catureṇa sarvalipijñena mahābhāratapurāṇarāmāyaṇānurāgiṇā bṛhatkathākuśalena dyūtādikalākalāpapārageṇa śrutarāgiṇā subhāṣitavyasaninā praśāntena surabhimāsamāruteneva satatadakṣiṇena, himagirikānanenevāntaḥsaralena, lakṣmaṇeneva rāmārādhananipuṇena, śatrughnenevāviṣkṛtabharataparicayena, divaseneva mitrānuvarttinā, baudheneva sarvāstivādaśūreṇa, sāṃkhyāgameneva pradhānapuruṣopetena, jinadharmmeṇeva jīvānukampinā, vilāsijanenādhiṣṭhitā, saśaileva prāsādaiḥ, saśākhānagareva mahābhavanaiḥ, sakalpavṛkṣeva satpuruṣaiḥ, darśitaviśvarūpeva citrabhittibhiḥ, sandhyeva padmarāgānurāgiṇī, amarādhipamūrttiriva makhaśatānaladhūmapūtā, paśupatilāsyakrīḍeva sudhādhavalāṭṭahāsā, vṛddheva jātarūpakṣayā, garuḍamūrttirivācyutasthitiramaṇīyā, prabhātaveleva prabuddhasarvalokā, śabaravasatirivāvalambitacārucāmaranāgadantadhavalagṛhā, śeṣatanuriva sadāsannavasudhādharā, jaladhimathanaveleva mahāghoṣapūritadigantarā, prastutābhiṣekabhūmiriva sannihitakanakaghaṭasahasrā, gaurīva mahāsiṃhāsanocitamūrttiḥ, aditiriva devakulasahasrasevyā, mahāvarāhalīleva darśitahiraṇyākṣapātā, āstīkatanuriva ānanditabhujaṅgalokā, harivaṃśakatheva anekabālakrīḍāramaṇīyā, prakaṭāṅganopabhogāpyakhaṇḍitacaritrā, raktavarṇāpi sudhādhavalā, avalambitamuktākalāpāpi vihārabhūṣaṇā, bahuprakṛtirapi sthirā, vijitāmaraloka dyutiravantīṣūjjayinī nāma nagarī / | | kad pb1.272 | śiśirasyāpi ripujanasantāpakāriṇaḥ sthirasyāpyavirataṃ bhramataḥ, nirmmalasyāpi malinīkṛtārātivanitāmukhakamaladyuteḥ, atidhavalasyāpi sarvajanarāgakāriṇaḥ, sudhāsūteriva jalanidhirudbhavo yaśasaḥ, pātālavadāśrito nijapakṣakṣatibhītaiḥ kṣitibhṛtāṃ kulaiḥ, grahagaṇa iva budhānugataḥ, makaradhvaja ivotsannavigrahaḥ, daśaratha iva sumitroṣetaḥ, paśupatiriva mahāsenānuyātaḥ, bhujagarāja iva kṣamābharaguruḥ, narmmadāpravāha iva mahāvaṃśaprabhavaḥ, avatāra iva dharmmasya, pratinidhiriva puruṣottamasya, parihṛtaprajāpīḍo rājā tārāpīḍo nāmābhūt / | | kad pb1.278 | yasmācca dhavalīkṛtabhuvanatalaḥ sakalalokahṛdayānandakārī krauñcādiva haṃsanivaho nirjagāma guṇagaṇaḥ / | | kad pb1.279 | yasya cāmṛtāmodasurabhiparimalayā mandaroddhatabahuladugdhasindhuphenalekhayeva dhavalīkṛtasurāsuralokayā daśasu dikṣu mukharitabhuvanamabhramyata kīrttyā / | | kad pb1.289 | tathāhi kadācidullasatkaṭhorakapolapulakajarjaritakarṇapallavānāṃ praṇayinīnāṃ candanajalacchaṭābhiriva smitasudhācchavibhirabhiṣicyamānaḥ, karṇotpalairiva locanāṃśubhistāḍyamānaḥ, kuṅkumadhūlibhirivābharaṇaprabhābhirākulīkriyamāṇalolalocanaḥ, dhavalāṃśukairiva karanakhamayūkhajālakairāhanyamānaḥ, campakakusumadalamālikābhiriva bhujalatābhirābadhyamānaḥ, daṣṭādharadhūtakaratalacalanmaṇivalayakalakalaramaṇīyam, atirabhasadalitadantapatradanturaśayanam, utkṣiptacaraṇagaladalaktakaraktaśekharam, sarabhasakacagrahacūrṇitamaṇikarṇapūram, ullasitakucakṛṣṇāgurupaṅkapatralatāṅkitapracchadapaṭam, acchaśramajalalulitagorocanātilakapatrabhaṅgam, anaṅgaparavaśaḥ suratamātatāna / | | kad pb1.291 | kadācit kucacandanacūrṇadhavalitārmmimālam, caṭulatulākoṭivācālacaraṇālaktakasiktahaṃsamithunam, alakanipatitakusumanikaraśāram, plavamānakarṇapūrakuvalayadalam, unnatanitambasaṃkṣobhajarjaritataraṅgam, uddalitanālaparyyastanalinanipatitadhūlipaṭalam, anavaratakarāsphālanasphuratphenabinducandrakitam, sāvarodhajano jalakrīḍayā gṛhadīrghikāṇāmambhaścakāra / | | kad pb1.295 | kadācinmuṣalāyudha iva candanadhavalaḥ kaṇṭhāvasaktollasallolakusumamālaḥ pānamasevata / |
|
