| kad pb1.263 | yasyāñca sandhyārāgāruṇā iva sindūramaṇikuṭṭimeṣu, prārabbhanīlakamalinīparimaṇḍalā iva marakatavedikāsu gaganatalaprasṛtā iva vaidūryyamaṇibhūmiṣu, timirapaṭalavighaṭanodyatā iva kṛṣṇāgurudhūmamaṇḍaleṣu abhibhūtatārakāpaṅktaya iva muktāprālambeṣu, vikacakamalacumbita iva nitambinīmukheṣu, grabhātacandrikāmadhyapatitā iva sphaṭikabhittiprabhāsugaganasindhutaraṅgāvalambina iva sitapatākāṃśukeṣu, pallavitā iva sūryyakāntopaleṣu, rāhumukhakuharapraviṣṭā ivendranīlavātāyanavivareṣu virājante ravigabhastayaḥ / | | kad pb1.278 | yasmācca dhavalīkṛtabhuvanatalaḥ sakalalokahṛdayānandakārī krauñcādiva haṃsanivaho nirjagāma guṇagaṇaḥ / | | kad pb1.291 | kadācit kucacandanacūrṇadhavalitārmmimālam, caṭulatulākoṭivācālacaraṇālaktakasiktahaṃsamithunam, alakanipatitakusumanikaraśāram, plavamānakarṇapūrakuvalayadalam, unnatanitambasaṃkṣobhajarjaritataraṅgam, uddalitanālaparyyastanalinanipatitadhūlipaṭalam, anavaratakarāsphālanasphuratphenabinducandrakitam, sāvarodhajano jalakrīḍayā gṛhadīrghikāṇāmambhaścakāra / | | kad pb1.405 | tatra ca sukṛtarakṣāsaṃvidhāne, navasudhānulepanadhavalite, prajvalitamaṅgalapradīpe, pūrṇakalasādhiṣṭhitapakṣake, pratyagralikhitamaṅgalyālekhyojjvalabhittibhāgamanohāriṇi, samuparacitasitavitānaparyyantāvabaddhamuktāguṇe maṇipradīpaprahatatimire vāsabhavane, bhūmilikhitapatralatākṛtarakṣāparikṣepam, śayanaśirobhāgavinyastadhavalanidrākalasam, ābaddhavividhauṣadhimūlayantrapavitram, avasthāpitarakṣāśaktivalayam, itastato vikīrṇagaurasarṣapam, avalambitabālayoktragrathitalauhapippalapatram, āsaktaharitāriṣṭapallavam, uttuṅgapādapīṭhapratiṣṭhitam, indudīghitidhavalapracchadapaṭam, acalarājaśilātalaviśālam garbhocitaṃ śayanatalamadhiśayānām, kanakapātraparigṛhītaiḥ avicchinnaviralāvasthitadadhilavaiḥjalataraṅgataralaśvetaśālisikthanikaraiḥ agrathitakusumasanāthaiḥ pūrṇabhājanaiḥ, akhiṇḍitānanamatsyapaṭalaiśca pratyagrapiśitapiṇḍamiśraiḥ, avicchinnasaliladhārānugamyamānamārgaiḥ, paṭalakaprajvalitaiśca śītalapradīpaiḥ, gorocanāmiśragaurasarṣapaiśca salilāñjalibhiśca, ācārakuśalenāntaḥpurajaratījanena kriyamāṇāvatāraṇakamaṅgalām, dhavalāmbaraviviktaveṣeṇa pramuditena prastutamaṅgalaprāyālāpena paurajanenopāsyamānām, upārūḍhagarbhatayā'ntargatakulaśailāmiva kṣitim, salilanimagnairāvatāmiva mandākinīm, guhāgatasiṃhābhiva girirājamekhalām, jaladharapaṭalāntaritadinakarāmiva divasaśriyam, udayagiritirohitaśaśimaṇḍalāmiva vibhāvarīm, abhyarṇabrahmakamalavinirgamāmiva nārāyaṇanābhim, āsannāgastyodayāmiva dakṣiṇāśām, phenāvṛtāmṛtakalasāmiva kṣīrodavelām, gorocanācitritadaśamanupahatamatidhavalaṃ dukūlayugalaṃ vasānāṃ vilāsavatīṃ dadarśa / | | kad pb1.410 | punaḥ punaścānubadhyamānā 'kiṃ māmatimātraṃ trapāparavaśāṃ karoṣi nāhaṃ kiñcidapi vedmi' ityabhidadhānā tiryyagvalitatārakeṇa cakṣuṣā avanatamukhī rājānaṃ sābhyasūyamivāpaśyat / | | kad pb1.438 | utthāya ca tathaiva tena caraṇavighaṭṭanakvaṇitanūpurasahasramukharitadigantareṇasarabhasotkṣepacalitamaṇivalayāvalīvācālitabhujalatena, ūrdhvīkṛtairuttānatalaiḥ karapuṭairanilalulitām ākāśagaṅgākamalinīmiva darśayatā, paryastamṛditakarṇapallavena, parasparāṅgadakoṭisaṭṭadaṣṭapāṭitottarīyāṃśukena, śramajaladhautāṅgarāgarañjitacīnavāsasā, kiñcidavaśiṣṭatamālapatreṇa, vilasadvāravilāsinīhasitairunnidrakairavavanānukāraṃ prathayatā, sarabhasavalānaskhalallolahāralatāsphālitakucasthalena, sindūratilakalulitālakalekhena, viprakīrṇapiṣṭātakapāṃśupuñjapiñjaritakeśapāśena, praṇṛtyavikalamūkakubjakirātavāmanabadhirajaḍajanapuraḥsareṇa, uttarīyāṃśukagrīvāvabaddhāvakṛṣṭaviḍambitajaratkañcukikadambakena, vīṇāveṇumurajakāṃsyatālalayānugatena, kalamadhuramudgāyatā, harṣanirbharatayā matteneva unmatteneva grahagṛhīteneva vyapagatavācyāvācyavivekena nṛtyagītakrīḍāprasaktenāntaḥpurikājanena, pracalitamaṇikuṇḍalāhatakapolabhittinā ca vighūrṇamānakarṇotpalenādhogalitavilolaśekhareṇa dolāyamānavaikakṣakakusumamālena nirddayaprahatabherīmṛdaṅgamarddalapaṭahaninādānugatakāhalaśaṅkharavajanitarabhasena caraṇasannipātairdārayateva vasudhāṃ rājaparijanena, pravṛttanṛtyena ca cāraṇagaṇena vividhamukhavādyakṛtakolāhalena paṭhatā gāyatā valgatā cānugamyamānaḥ śukanāsabhavanaṃ gatvā dviguṇataramutsavamakārayat / | | kad pb1.485 | aruṇenāśvālaṅkāreṇālaṅkṛtam, aśvālaṅkāranihitamarakataratnaprabhāśyāmāyamānadehatayā gaganatalanipatitadivasakararathaturagaśaṅkāmivopajanayantam, atitejasvitayā javanirodharoṣavaśāt pratiromakūpāt samudgatāni sāgaraparicayalagnāni muktāphalānīva svedalavajālakāni varṣantam, indranīlamaṇipādapīṭhānukāribhirañjaniśilāghaṭitairiva anavaratapatanotpatanajanitaviṣamamukharavaiḥ pṛthubhiḥ khurapuṭairjjarjaritavasundharairmurajavādyamivābhyasyāntam, utkīrṇamiva, jaṅghāsu, vistāritamivorasi, ślakṣṇīkṛtamiva mukhe, prasāritamiva kandharāyām, ullikhitamiva pārśvayoḥ, dviguṇīkṛtamiva jaghanabhāge, javapratipakṣamiva garutmataḥ, trailokyasañcaraṇasahāyamiva mārutasya, aṃśāvatāramivoccaiśravasaḥ, vegasabrahmacāriṇamiva manasaḥ, haricaraṇamiva sakalavasundharollaṅghanakṣamam, varuṇahaṃsamiva mānasapracāram, madhumāsadivasamiva vikasitāśokapāṭalam, vratinamiva bhasmasitapuṇḍrakāṅkitamukham / | | kad pb1.505 | samāruhya taṃ prādeśamātramiva trailokyamakhilaṃ manyamāno nirgatya, jaladharavimuktopalāsāraparuṣeṇa jarjarayateva ralātalamatiniṣṭhureṇa khurapuṭānāṃ raveṇa, khurarajoniruddhaghrāṇaghoraghoṣeṇa ca heṣitena badhirīkṛtasakalabhuvanavivaram, aśiśirakiraṇadīdhitiparāmarśa sphuritavimalaphalakena ūrdhvīkṛtena kuntalatāvanena unnālanīlotpalakalikāvanagahanaṃ sara iva gaganatalamalaṅkurvāṇam, uddaṇḍamayūrātapatrasahasrāndhakāritāṣṭadiṅmukhatayā sphuritaśatamanucāpakalāpakalmāṣamiva jaldharavṛndam, udvamatphenapuñjadhavalitamukhatayā anavaratavalganacaṭulatayā ca pralayasāgarajalakallolasaṅghātamiva samudgatam / | | kad pb1.509 | ekaikaśaśca pratināmagrahaṇam, āvedyamānā valāhakena vicalitamukuṭapadmarāgakiraṇodgamacchalenānurāgamivodvamadbhiḥ saṅghaṭitasevāñjalimukulatayā yauvarājyābhiṣekakalasāvarjitasalilalagnakamalairiva dūrāvanataiḥ śirobhiḥ praṇemuḥ / | | kad pb1.519 | muhūrttādiva yuvatijananirantaratayā nārīmayā iva prāsādāḥ, sākaktakapadakamalavinyāsaiḥ pallavamayamiva kṣititalam, aṅganānām, aṅgaprabhāpravāheṇa lāvaṇyamayamiva nagaram, ānanamaṇḍalanivahena candravimbamayamiva gaganatalam, ātapanivāraṇāyottānitakaratalajālakena kamalavanamayamiva dikcakravālam, ābharaṇāṃśukalāpena indrāyudhamaya ivātapaḥ, locanamayūkhalekhāsantānena nīlotpaladalamaya iva divaso babhūva / | | kad pb1.568 | avatīryya ca karatalena kare vaiśampāyanamavalambya puraḥ savinayaṃ prasthitena balāhakenopadiśyamānamārgaḥ tribhuvanamiva puñjobhūtam, āgṛhītakanakavetralataiḥ sitavārabāṇaiḥ sitāṅgarāgaiḥ sitakusumaśekharaiḥ sitoṣṇīṣaiḥ sitaveṣaparigrahatayā śvetadvīpasambhavairiva kutayugapuruṣairiva mahāpramāṇairdivāniśamālikhitairiva utkīrṇairiva toraṇastambhaniṣaṇṇairdvārapālairanujjhitadvāradeśam, anekasañjavanacadraśālāviṭaṅkavedikāsaṅkaṭaśikharairabhraṅkaṣairupahasitakailāsaśailaśobhaiḥ amalasudhāvadātaiḥ saprāleyaśailamiva mahāprāsādaiḥ, anekavātāyanavivaravinirgatayuvatibhūṣaṇakiraṇasahasratayā kanakaśṛṅkhalājālakenevoparivistīrṇena virājamānam, antargatāyudhanivahābhirāśīviṣakulasaṅkulābhiḥ pātālaguhābhirivātigambhīrābhirāyudhaśālābhirupetam, abalācaraṇālaktakarasaraktamaṇiśakalaiḥ śikharanilīnaśikhikulakṛtakekāravakalakalaiḥ krīḍāparvatakairupaśobhitam, ujjvalavarṇakambalāvaguṇṭhitakanakaparyyāṇābhiḥ pralambacāmarakalāpa cumbita calakarṇapallavābhiḥkulayuvatibhirivoparūḍhaśikṣāvinayanibhṛtābhiḥ yāmakareṇukābhiraśūnyakakṣāntaram, ālānastambhaniṣaṇṇena ca navajaladharaghoṣagambhīram, anugatavīṇāveṇuravaramyam, āsphālitaghargharikāghargharam, anavaratamṛdumṛdaṅgadhvanim, āmīlitalocanatribhāgeṇa vāmadaśanakoṭiniṣāṇahastena niścalakarṇatālenākarṇayatā, salīlamubhayapārśvāvalambivarṇakambalatayā vindhyagiriṇevāviṣkṛtadhātuvicitrapakṣasampuṭena, ādhoraṇagītānandakṛtamandrakaṇṭhagarjitena, madajalaśabalaśaṅkhaśobhitaśravaṇapuṭena, rajanikarabimbacumbisaṃvarttakāmbudavṛndaviḍambakena karṇāntalambinā kāñcanamayena kṛtakarṇapūramivāṅkuśena mukhamadvahatā, madajalamalinena dvitīyeneva karṇacāmareṇa kapolataladolāyamānena madhukarakulenālaṅkriyamāṇena, atyudagratayā pūrvakāyasya ativāmanatayā ca jaghanabhāgasya pātālādiva uttiṣṭhatā, niśāsamayeneva parisphuratsārddhacandranakṣatramālena, śaradārambheṇeva prakaṭitāruṇacārupuṣkareṇa, vāmanarūpeṇeva kṛtatripadīvilāsena, sphaṭikagiritaṭeneva lagnasiṃhamukhapratimena, prasādhiteneva ālolakarṇapallavāhatamukhena, gandhamādananāmnā gandhahastinā sanāthīkṛtaikadeśam, ujjvalapaṭṭakambalapaṭuprāvāritapṛṣṭhaiśca rasitamadhuraghaṇṭikāravamukharakaṇṭhaiḥ, mañjiṣṭhālohitaskandhakesarabālaiḥ, nihatavanagajarudhirapāṭalasaṭairiva kesaribhiḥ, puronihitayavasarāśiśikharopaviṣṭamandurāpālaiḥ, āsannamaṅgalagītadhvanidattakarṇaiḥ, antaḥkapoladhṛtamadhurasarasalulitalājakavalaiḥ, bhūpālavallabhairmandurāgataisturaṅgamairudbhāsitam, adhikaraṇamaṇḍapagataiścāryyaveśairatyuccavetrāsanopaviṣṭairdharmmamayairiva dharmmādhikāribhirmahāpuruṣairadhiṣṭhitam, adhigatasakalagrāmanagaranāmabhirekabhavanamiva jagadakhilamālokayadbhirālikhitasakalabhuvanavyāpāratayā dharmmarājanagaravyatikaramiva darśayadbhiradhikaraṇalekhakairālikhyamānaśāsanasahasram, abhyantarāvasthitanarapatinirgamapratīkṣaṇapareṇa ca sthānasthāneṣu baddhamaṇḍalena, kanakamayārddhacandratārāgaṇaśavalaiḥ carmmaphalakairniśāsamayamiva darśayatā, sphuritaniśitakaravālakaraprarohakarālitātapena,ekaśravaṇapuṭaghaṭitadhavaladantapatreṇa ūrdhvabaddhamaulikalāpena, dhavalacandanasthāsakakhacitabhujorudaṇḍena, baddhāsidhenukena, andhradraviḍasiṃhalaprāyeṇa sevakajanena, āsthānamaṇḍapagatena ca yathocitāsanopaviṣṭena prasārayatā durodarakrīḍām, abhyasyatā'ṣṭāpadavyāpāram, āsphālayatā parivādinīm, ālikhatā citraphalake bhūmipālapratibimbam, ābadhnatā kāvyagoṣṭhīm, ātanvatā parihāsakathām, vindatā bindumatīm, cintayatā prahelikām, bhāvayatā narapatikṛtakāvyasubhāṣitāni, paṭhatā dvipadīm, gṛhṇatā kaviguṇān, utkiratā patrabhaṅgān, ālapatā vāravilāsinījanam, ākarṇayatā vaitālikagītam, anekasahasrasaṃkhyena dhavaloṣṇīṣapaṭāśliṣṭavikaṭakirīṭasaṅkaṭaśirasāsanirjharaśikharalagnabālātapamaṇḍaleneva kulaparvatacakravālena, mūrddhābhiṣiktena, sāmantalokenādhiṣṭhitam, āsthānotthitabhūmipālasaṃvarttitānāñca kuthānāṃ ratnāsanānāñca rāśibhiranekavarṇairindrāyadhapuñjairiva virājitasabhāparyyantam, amalamaṇibhūmisaṃkrāntamukhanivahapratibimbatayā vikacakamalapuṣpaprakaramiva sampādayatā, gativaśaraṇitanūpurapārihāryyaraśanāsvanamukhareṇa, skandhāvasaktakanakadaṇḍacāmareṇa, nirgacchatā praviśatā cānavarataṃ vāravilāsinījanenākulitam, ekadeśaniṣaṇṇacāmīkaraśṛṅkhalāsaṃyataśvagaṇam, itastataḥ pracalitaparicitāmitakastūrikākuraṅgaparimalavāsitadiṅmukham, anekakubjakirātavarṣavarabadhiravāmanamūkasaṅkulam, upāhṛtakinnaramithunam, ānītavanamānuṣam, ābaddhameṣakukkuṭakurarakapiñjalalāvakavarttikāyuddham, utkūjitacakorakādambahārītakokilam, lālapyamānaśukasārikam, ibhapatimadaparimalāmarṣajṛmbhitaiśca niṣkūjadbhiḥ śikhariṇāṃ jīvitairiva giriguhānivāsibhirgṛhītaiḥ pañjarakesaribhirudbhāsyamānam, uttrasyamānaiḥ kāñcanabhavanaprabhājanitadāvānalaśaṅkairlolatārakairbhramadbhirvanahariṇakadambakairlocanaprabhayā śavalīkṛtadigantaram, uddāmakekāravānumīyamānamarakatakuṭṭīmasthitaśikhaṇḍimaṇḍalam, atiśiśiracandanaviṭapicchāyāniṣaṇṇanidrāyamāṇagṛhasārasam, antaḥpureṇa ca bālikājanaprastutakandukapañcālikākrīḍena, aviratavāhyamānadolāśikharakvaṇitaghaṇṭāṭaṅkārapūritāśāmukhena, bhujaganirmmokaśaṅkitamayūrahriyamāṇahāreṇa, saudhaśikharāvatīrṇapracalitapārāvatakulatayā sthalotpalinīvanaśobhiteneva, antaḥpurikājanaprastutanarapaticaritaviḍambanakroḍena, aśvamandurāparibhraṣṭāgatairavaluptabhavanadāḍimīphalairākhaṇḍitāṅganasahakārapallavairabhibhūtakubjavāmanakirātakaratalācchinnāni bhūṣaṇāni vikiradbhiḥ kapibhirākulīkṛtena, śukasārikāprakāśitasuratavisrambhālāpalajjitāvarodhajanena, prāsādasopānasamārohaṇacalitairabalānāṃ caraṇāvasaktairmaṇimayaiḥ pade pade raṇadbhistulākoṭivalayairdviguṇīkṛtakūjitarutābhiḥ bhavanakalahaṃsamālābhirdhavalitāṅganena, dhṛtadhautadhavaladukūlottarīyaiḥ kaladhautadaṇḍāvalambibhiḥ palitapāṇḍuramaulibhirācāramayairiva vinayamayairiva maryyādāmayairiva maṅgalamayairiva gambhīrākṛtibhiḥ svabhāvadhīrairuṣṇīṣibhirvayaḥpariṇāme'pi jaratsiṃhairivāparityaktasattvāvaṣṭambhaiḥ kañcukibhiradhiṣṭhitena samupetābhyantaram, jaladharasanāthamiva kṛṣṇāgurudhūmapaṭalaiḥ, sanīhāramiva yāmakuñjaraghaṭākaraśikaraiḥ, saniśamiva tamālavīthikāndhakāraiḥ, sabālātapamiva raktāśokaiḥ, satārāgaṇamiva muktākalāpaiḥ, savarṣāsamayamiva dhārāgṛhaiḥ, sataḍillatamiva hemamayībhirmayūrayaṣṭibhiḥ, sagṛhadaivatamiva śālabhañjikābhiḥ, śivabhavanamiva dvārāvasthitadaṇḍapāṇipratīhāragaṇam, utkṛṣṭakavigadyamiva vividhavarṇaśreṇipratipādyamānānekābhinavārthasañcayam, apsarogaṇamiva prakaṭamanoramārambham, divasakarodayamiva ullasatpadmākarakamalāmodam, uṣṇakiraṇamiva nijalakṣmīkṛtakamalopakāram, nāṭakamiva patākāṅkaśobhitam, śoṇitapuramiva bāṇāyogyāvāsopetam, purāṇamiva vibhāgāvasthāpitasakalabhuvanakośam, sampūrṇacandrodayamiva mṛdukarasahasrasaṃvarddhitaratnālayam, diggajamivāvicchinnamahādānasantānam, brahmāṇḍamiva sakalajīvalokavyavahārakāraṇotpannahiraṇyagarbham, īśānabāhuvanamiva mahābhogimaṇḍalasahasrādhiṣṭhitaprakoṣṭham, mahābhāratamivānantagītākarṇanānanditanaram, yaduvaṃśamiva kulakramāgataśūrabhīmapuruṣottamabalaparipālitam, vyākaraṇamiva prathamamadhyamottamapuruṣavibhaktisthitānekādeśakārakākhyātasampradānakriyāvyayaprapañcasusthitam, udadhimiva bhayāntaḥpraviṣṭasapakṣabhūmibhṛtsahasramaṅkulam, uṣāniruddhasamāgamamiva citralekhādarśitavicitrasakala tribhuvanākāram, baliyajñamiva purāṇapuruṣavāmanādhiṣṭhitābyantaram, śuklapakṣapradoṣamiva vitataśaśikiraṇakalāpadhavalāmbaravitānam, | | kad pb1.570 | sasambhramopagataiśca kṛtapraṇāmaiḥ pratīhāramaṇḍalairupadiśyamānamārgaḥ, sarvataḥ pracalitena ca pūrvakṛtāvasthānena dūraparyyastamauliśithilitacūḍāmaṇimarīcicumbitavasudhātalena rājalokena pratyekaśaḥ pratīhāranivedyamānena sādaraṃ praṇamyamānaḥ, pade pade cābhyantaravinirgatābhirācārakuśalābhirantaḥpuravṛddhābhiḥ kriyamāṇāvataraṇamaṅgalaḥ, bhuvanāntarāṇīva vividhaprāṇisahasrataṅkulāni saptakakṣāntarāṇyatikramya, abhyantarāvasthitam, anavarataśastragrahaṇaśyāmikālīḍhakaratalaiḥ karacaraṇalocanavarjamasitalohajālakāvṛtaśarīraiḥ, ālānastambhairiva gajamadaparimalalobhanirantaranilīnamadhukarapaṭalajaṭilaiḥ kulakramāgatairudāttānvayairanuraktairmahāprāṇatayā atikarkaśatayā ca dānavairiva atiśayākāraiḥ sambhāvyamānaparākramaiḥ sarvataḥ śarīrarakṣādhikāraniyuktaiḥ puruṣāiḥ parivṛtam, ubhayato vāravilāsinībhiścānavaratamuddhayamānadhavalacāmaram, amalapulinatalaśobhinī surakuñjaramiva mandākinīvāriṇi haṃsadhavalaśayanatale niṣaṇṇaṃ pitaramapaśyat' / | | kad pb1.571 | ālokaye'ti ca pratīhāravacanānantaram, atidūrāvanatena calitacūḍāmaṇinā śirasā kṛtapraṇāmam, 'ehyehi' ityabhidadhānaḥ dūrādeva prasāritabhujayugalaḥ, śayanatalādīṣaducchvasitamūrtiḥ, ānandajalapūryyamāṇaṃlocanaḥ samudgatapulakatayā sīvyanniva, ekīkurvanniva pibanniva taṃ pitā vinayāvanatamāliliṅga / | | kad pb1.582 | yathā pituḥ prasādāt samastābhirupeto vidyābhirāloki to'si, evamacireṇaiva kālenānurūpābhirvadhūbhirupetamālokayiṣyāmi' etyevamabhidhāya lajjāsmitāvanatamātmamukhapratibimbagarbhe vikacakamalakṛtakarṇapallavāvataṃsa iva kapole paryyacumbadenam / | | kad pb1.601 | gaganatalādavatarantyā divasaśriyaḥ padmarāganūpuramiva svaprabhāpihitarandhraṃ ravimaṇḍalamunmuktapādaṃ papāta / | | kad pb1.607 | krameṇa ca pratīcīṃ karṇapūraraktotpale lokāntaramupagate bhagavati gabhastimālini, samullasitāyāmambarataḍāgavikacakamalinyāṃ sandhyāyām, kṛṣṇāgurupaṅkapatralatāsthiva timiralekhāsu sphurantīṣu diśāṃ mukheṣu, alikulamalinena kuvalayavaneneva raktakamalākare timiranikareṇa utsāryamāṇe sandhyārāge, kamalinīnipītamātapamunmūlayitumandhakārakarapallaveṣviva praviśatsu raktakamalodarāṇi madhukarakuleṣu, śanaiḥ śanaiśca niśāvilāsinīmukhāvataṃsapallave galite sandhyārāge, dikṣu vikṣipteteṣu sandhyādevatāccanabalipiṇḍeṣu, śikharadeśalagnatimirāsvanārūḍhamayūrāsvapi mayūrādhiṣṭhitāsviva mayūrayaṣṭiṣu, gavākṣavivaranilīneṣu prāsādalakṣmīkarṇotpaleṣviva pārāvateṣu, vigatavilāsinīsaṃvāhananiścalakāñcanapīṭhāsu mūkībhūtaghaṇṭāsu antaḥpuradolāsu, bhavanasahakāraśākhāvalambitapañjareṣu, śukasārikānivaheṣu, saṅgītavirāmaviśrāntaravāsūtsāryyamāṇāsu vīṇāsu, yuvatinūpuraśabdopaśamanibhṛteṣu bhavanakalahaṃseṣu, apanīyamānakarṇaśaṅkhacāmaranakṣatramālāmaṇḍaneṣu madhukara śunyakapolabhittiṣu mattavāraṇeṣu, pradīpyamāneṣu rājavallabhaturaṅgamamandurāpradīpeṣu praviśantīṣu prathamayāma kuñjaraghaṭāsu, kṛtasvastyayaneṣu niṣkrāmatsu purohiteṣu, visarjitarājalokaviralaparijaneṣu vistāriteṣviva rāja kulakakṣāntareṣu, prajvalitadīpikāsahasrapratibimbacumbiteṣu kṛtavikacacanpakadalopahāreṣviva maṇibhūmikuṭṭimeṣu, nipatitadīpālokāsu ravivirahārttanalinīvinodanāgatabālātapāsviva bhavadīghikāsu, nidrālaseṣu pañjarakesariṣu, samāropitakārmmuke gṛhītasāyake yāmika ivāntaḥpurapraviṣṭe makaraketau, avataṃsapallaveṣviva sarāgeṣu karṇe kriyamāṇeṣu suratadvatīvacaneṣu, sūryakāntamaṇibhya iva saṃkrāntānaleṣu jvalatsu māninīnāṃ śokavidhureṣu hṛdayeṣu, pravṛttai pradoṣasamaye candrāpīḍaḥ prajvalitadīpikācakravālaparivāraścaraṇābhyāmeva rājakulaṃ gatvā pituḥ samīpe muhūrttaṃ sthitvā dṛṣṭvā ca vilāsavatīmāgatya svabhavanamanekaratnaprabhāśabalamuragarājaphaṇāmaṇḍalamiva hṛṣīkeśaḥ śayanatalamadhiśiśye / | | kad pb1.703 | apare tu svārthaniṣpādanaparairdhanapiśitagrāsagṛdhrairāsthānanalinībakaiḥ, dyūtaṃ vinodaiti, paradārābhigamanaṃ vaidagdhyamiti, mṛgayā śrama iti, pānaṃ vilāsa iti, pramattatā śauryyamiti, svadāraparityāgaḥ avyasaniteti, guruvacanāvadhīraṇamaparapraṇeyatvamiti, ajitabhṛtyatā sukhopasevyatvamiti, nṛtyagītavādyaveśyābhisaktiḥ rasikateti, mahāparādhānākarṇanaṃ mahānubhāvateti, paribhavasahatvaṃ kṣameti, svacchandatā prabhutvamiti, devāvamānanaṃ mahāsattvateti, vandijanakhyātiḥ yaśa iti, taralatā utsāha iti, aviśeṣajñatā apakṣapātitvamiti, doṣānapi guṇapakṣamadhyāropayadbhirantaḥ svayamapi vihasadbhiḥ pratāraṇakuśalairdhūrttairamānuṣocitābhiḥ stutibhiḥ pratāryyamāṇā vittamadamattacittā niścetanatayā tathaivetyanyāropitālīkābhimānā martyadharmmāṇo'pi divyāṃśāvatīrṇamiva sadaivatamivātimānuṣam ātmānamutprekṣamāṇāḥ prārabdhadivyocitaceṣṭānubhāvāḥ sarvajanasyopahāsyatāmupayānti / | | kad pb1.729 | nirgacchaṃśca abhyantarāvasthita eva prākārāntaritadarśanānāṃ dvārāvasthitānāṃ pratipālayatāṃ rājñāmunmayūkhānāṃ cūḍāmaṇīnāmalaktakadravadyutimuṣā bahalenālokabālātapena rājyābhiṣekānantaraprasṛtena svapratāpavahninevātyarthaṃ piñjarīkriyamāṇā daśa diśaḥ yauvarājyābhiṣekajanmanā nijānurāgeṇevarajyamānamavanitalam, āsannaripuvināśapiśunena digdāheneva pāṭalīkriyamāṇamambaratalam, abhimukhāgatabhuvanatalalakṣmīcaraṇālaktakaraseneva lohitāyamānātapaṃ divasaṃ dadarśa / | | kad pb1.730 | vinirgataśca sasambhramapracalitagajaghaṭāsahasrairanyonyasaṅghaṭṭajarjaritātapatramaṇḍalairādarāvanatamauliśithila maṇimukuṭapaktibhirāvarjitaratnakarṇapūraiḥ kapolasthalaskhalitaratnakuṇḍalairājñaptasenāpatinirddiśyamānanāmabhiravanibhujāṃ cakrabālaiḥ graṇamyamānaḥ, bahalasindūrareṇupāṭalena kṣititaladolāyamānasthūlamuktākalāpāvacūlena sita kusumamālājālaśabalaśirasā saṃlagnasandhyātapena tiryyagāvarjjitaśvetagaṅgāpravāheṇa tārāgaṇadanturitaśikharaśilātalena merugiriṇeva gandhamādanenānugamyamānaḥ, kanakālaṅkāraprabhāpratānakalmāṣitāvayavena ca dattakuṅkamasthāsakenevākṛṣyamāṇenendrāyudhena sanāthīkṛtapurobhāgaḥ śanaiḥ śanaiḥ prathamameva śātakratavīmāśāmabhipratasthe / | | kad pb1.747 | śanaiḥ śanaiśca balasaṃkṣobhajanmā kṣiteranekavarṇatayā kvacijjīrṇaśapharakroḍadhūmraḥ, kvacit kramelakasaṭāsannibhaḥ, kvacit pariṇatarallakaromapallavamalinaḥ, kvacit patrorṇatantupāṇḍuraḥ, kvacijjaraṭhamṛṇāladaṇḍadhavalaḥ, kvacijjaratkapikeśarakapilaḥ, kvaciddharavṛṣabharomanthaphenapiṇḍapāṇḍuraḥ, tripathagāpravāha iva haricaraṇaprabhavaḥ, kupita iva muñcan kṣamām, ārabdhaparihāsa iva rundhannayanāni, tṛṣita iva piban karikaraśīkarajalāni, pakṣavānivotpatan gaganatalam, alinivaha iva cumban bhadalekhām, mṛgapatiriva racayan karikumbhasthalīṣu padam, upāttavijaya iva gṛhṇan patākāḥ jarāgama iva pāṇḍurīkurvan śirāṃsi, mudrayanniva pakṣmāgrasaṃsthito dṛṣṭim, ājaghranniva makarandamadhubindupaṅkalagnaḥ karṇotpalāni, madakalakarikarṇatāla tāḍanatrasta iva viśan karṇaśaṅkhodaravivarāṇi, pīyamāna ivonmukhībhiravanipatimukuṭamaṇi bhaṅgamakarikābhiḥ, abhyarcyamāna iva turagamukhavikṣepaviplutaiḥ phenapallavakusumastabakaiḥanugamyamāna iva gattagajaghaṭākumbhabhittisambhavena dhātudhūlivalayena, āliṅgyamāna iva calaccāmarakalāpavidhutena paṭāvāsapāṃśunā, protsāhyamāna iva narapatiśekharasahasraparicyutaiḥ kusumakeśararajobhiḥ, utpātarāhuriva divasakaramaṇḍalamakāṇḍa eva piban, nṛpaprasthānamaṅgalapratisaravalayamālikāsu |
|
