| kad pb1.54 | sa tasyāśca vijitāśeṣabhuvanamaṇḍalatayā vigatarājyacintābhāranirvṛtaḥ, dvīpāntarāgatānekabhūmipālamaulimālālālitacaraṇayugalaḥ, valayamiva līlayā bhujena bhuvanabhāramudvahan, amaragurumapi prajñayopahasadbhiranekakulakramāgatairasakṛdālocitanītiśāstranirmmalamanobhiralubdhaiḥ snigdhaiḥ prabuddhaiścāmātyaiḥ parivṛtaḥ, samānavayovidyālaṅkārairanekamūrddhābhiṣiktapārthivakulodgatairakhilakalākalāpālocanakaṭhoramatibhiratipragalbhaiḥ kālavidbhiḥ premānuraktahṛdayairagrāmyaparihāsakuśalairiṅgitākāravedibhiḥ kāvyanāṭakākhyānakākhyāyikālekhyavyākhyānādikriyānipuṇairatikaṭhinapīvaraskandhorubāhubhirasakṛdavadalitasamadaripugajaghaṭāpīṭhabandhaiḥ keśarikiśorakairiva, vikramaikarasairapi vinayavyavahāribhirātmanaḥ prativimbairiva rājaputraiḥ saha ramamāṇaḥ prathame vayasi sukhamaticiramuvāsa / | | kad pb1.56 | satyapi rūpavilāsopahasitarativibhrame lāvaṇyavati vinayavatyanvayavati hṛdayahāriṇi cāvarodhajane, sa kadācidanavaratadolāyamānaratnavalayo ghargharikāsphālanaprakampajhaṇajhaṇāyamānamaṇikarṇapūraḥ svayamārabdhamṛdaṅgavādyaḥ saṅgītakaprasaṅgena, kadācidaviralavimuktaśarāsāraśūnyakṛtakānano mṛgayāvyāpāreṇa, kadācidābaddhavidagdhamaṇḍalaḥ kāvyaprabandharacanena, kadācicchāstrālāpena, kadācidākhyānakākhyāyiketihāsapurāṇākarṇanena, kadācidālekhyavinodena, kadācidvīṇathā, kadāciddarśanāgatamunijanacaraṇaśuśrūṣayā, kadācidakṣaracyutakamātrācyutakabindumatīgūḍhacaturthapādaprahelikāpradānādibhiḥ, vanitāsambhogasukhaparāṅmukhaḥ suhṛtparivṛto divasamanaiṣīt / | | kad pb1.58 | ekadā tu nātidūrodite nava nalinadalasampuṭabhidi kiñcinmuktapāṭalimni bhagavati sahasramarīcimālini, rājānamāsthānamaṇḍapagatamaṅganājanaviruddhena vāmapārśvāvalambinā kaukṣeyakeṇa sannihitaviṣadhareva candanalatābhīṣaṇaramaṇīyākṛtiḥ, aviralacandanānulepanadhavalitastanataṭā unmajjadairāvatakumbhamaṇḍaleva mandākinī, cūḍāmaṇisaṃkrāntaprativimbacchalena rājājñeva mūrttimatī rājabhiḥ śirobhiruhyamānā, śaradiva kalahaṃsadhavalāmbarā, jāmadagnyaparaśudhāreva vaśīkṛtasakalarājamaṇḍalā, vindhyavanabhūmiriva vetralatāvatī, rājyādhidevateva vigrahiṇī, pratīhārī samupasṛtya kṣititalanihitajānukarakamalā savinayamabravīt ?? "deva! dvārasthitā suralokamārohatastriśaṅkoriva kupitaśatamakhahuṅkāranipātitā rājalakṣmīrdakṣiṇāpathādāgatā caṇḍālakanyakā pañjarasthaṃ śukamādāya devaṃ vijñāpayati ?? 'sakalabhuvanatalasarvaratnānām udadhirivaikabhājanaṃ devaḥ, vihaṅgamaścāyamāścaryyabhūto nikhilabhuvanatalaratnamiti kṛtvā devapādamūlamenamādāyāgatā'hamicchāmi devadarśanasukhamanubhavitum" iti / | | kad pb1.62 | praviśya ca sā narapatisahasramadhyavarttinamaśanibhayapuñjitakulaśailamadhyagatamiva kanakaśikhariṇam, anekakatnābharaṇakiraṇajālakāntaritāvayavamindrāyuddhasahasrasañchāditāṣṭadigvibhāgamiva jaladharadivasam, avalambitasthūlamuktākalāpasya kanakaśṛṅkhalāniyamitamaṇidaṇḍikācatuṣṭayasya gaganasindhuphenapaṭalapāṇḍurasya nātimahato dukūlavitānasyādhastādindukāntamaṇiparyyaṅkikāniṣaṇṇam, uddhūyamānakanakadaṇḍacāmarakalāpam, unmayūkhamukhakāntinicayaparābhavapraṇate śaśinīva sphaṭikapādapīṭhe vinyastavāmapādam, indranīlamaṇikuṭṭimaprabhāsamparkaśyāmāyamānaiḥ praṇataripuniśvāsamalinīkṛtairiva caraṇanakhamayūkhajālairupaśobhamānam, āsanollasitapadmarāgakiraṇapāṭalīkṛtenāciramṛditamadhukaiṭabharudhirāruṇena harimivoruyugalena virājamānam, amṛtaphenadhavale gorocanālikhitahaṃsamithunasanāthaparyyante cāmarapavanapranarttitāntadeśe, dukūle vasānam, atisurabhicandanānulepanadhavalitoraḥsthalam, uparivinyastakuṅkumasthāsakam, antaranipatitabālātapacchedamiva kailāsaśikhariṇam, aparaśaśiśaṅkayā nakṣatramālayeva hāralatayā kṛtamukhapariveṣam, aticapalarājalakṣmībandhanigaḍaśaṅkāmupajanayatendramaṇikeyūrayugalena, malayajarasagandhalubdhena bhujaṅgadvayeneva veṣṭitavāhuyugalam, īṣadālambikarṇotpalam, unnataghoṇam, utphullapuṇḍarīkalocanam, amalakaladhautapaṭṭāyatam, aṣṭamīcandraśakalākāram, aśeṣabhuvanarājyābhiṣekasalilapūtam, ūrṇāsanāthaṃ lalāṭadeśamudvahantam, āmoditamālatīkusumaśekharam uṣasiśikharaparyyastatārakāpuñjamiva paścimācalam, ābharaṇaprabhāpiśaṅgitāṅgatayā lagnaharahutāśamiva makaradhvajam, | | kad pb1.174 | tathāhi ravirambaratalamadhyavarttī sphurantamātapamanavaratamanaladhūlinikaramiva vikirati karaiḥ, adhikāmupajanayati tṛṣām / | | kad pb1.177 | tattanayaśca hārītanāmā munikumārakaḥ sanatkumāra iva sarvavidyāvadātacetāḥ, samānavayobhiraparaistapodhanakumārakairanugamyamānastenaiva pathā dvitīya iva bhagavān vibhāvasuratitejasvitayā durnirīkṣyamūrttiḥ, udyato divasakaramaṇḍalādivotkīrṇaḥ taḍidbhiriva viracitāvayavaḥ, taptakanakadraveṇeva bahirupaliptamūrttiḥ, āpiśaṅgāvadātayā dehaprabhayā sphurantyā sabālātapamiva divasaṃ sadāvānalamiva vanamupadarśayan, uttaptalauhalohinīnāmanekatīrthābhiṣekapūtānāmaṃsasthalāvalambinīnāṃ jaṭānāṃ nikareṇopetaḥ, stambhitaśikhākalāpaḥ, khāṇḍavavanadidhakṣayā kṛtakapaṭavaṭuveśa iva bhagavān dakṣiṇaśravaṇāvalambinā virājamānaḥ, sakalaviṣayopabhoganivṛttyarthamupapāditena lalāṭapaṭṭake trisatyeneva bhasmatripuṇḍrakeṇālaṅkṛtaḥ, gaganagamanonmukhabalākānukāriṇā svargamārgamiva darśayatā satatamudprīveṇa sphaṭikamaṇikamaṇḍalunādhyāsitavāmakaratalaḥ, skandhadeśāvalambinā kṛṣṇājinena nīlapāṇḍubhāsā tapastṛṣṇānipītenāntarniṣpatatā dhūmapaṭaleneva parītamūrttiḥ, abhinavabisasūtranirmiteneva parilaghutayā pavanalolena nirmmāṃsaviralapārśvāsthipañjaramiva gaṇayatā vāmāṃṣāvalambinā yajñopavītenodbhāsamānaḥ, devatārccanārthamāgṛhītavanalatākusumaparipūrṇaparṇapuṭasanāthaśikhareṇāṣāḍhadaṇḍena vyāpṛtasavyetarapāṇiḥ, viṣāṇaśikharotkhātāmudvahatā srānamṛdamupajātaparicayena nīvāramuṣṭisaṃvarddhitena kuśakusumalatāyāsyamānaloladṛṣṭinā tapovanamṛgeṇānugamyamānaḥ, viṭapa iva komalavalkalāvṛtaśarīraḥ, giririva samekhalaḥ, rāhurivāsakṛdāsvāditasomaḥ, padmanikara iva divasakaramarīcipaḥ, nadītaṭataruriva satatajalakṣālanavimalajaṭaḥ, karikarabha iva vikacakumudadalaśakalasitadaśanaḥ, drauṇiriva kṛpānugataḥ, nakṣatrarāśiriva citramṛgakṛttikāśleṣopaśobhitaḥ, gharmmakāladivasa iva kṣayitadoṣaḥ, jaladharasamaya iva praśāmitarajaḥprasaraḥ, varuṇa iva kṛtodavāsaḥ, haririvāpanītanarakabhayaḥ, pradoṣārambha iva sandhyāpiṅgalatārakaḥ prabhātakāla iva bālātapakapilaḥ, raviratha iva dṛḍhaniyamitākṣacakraḥ, surājeva nigūḍhamantrasādhanakṣapitavigrahaḥ, jaladhiriva karālaśaṅkhamaṇḍalāvarttanābhigarttaḥ, bhagīratha iva dṛṣṭagaṅgāvatāraḥ, bhramara ivāsakṛdanubhūtapuṣkaravanavāsaḥ, vanacaro'pi kṛtamahālayapraveśaḥ, asaṃyato'pi mokṣārthī, sāmaprayogaparo'pi satatāvalambitadaṇḍaḥ, supto'pi prabuddhaḥ, sannihitanetradvayo'pi parityaktavāmalocanastadeva kamalasaraḥ sisnāsurupāgamat / | | kad pb1.231 | ityevamupayācitastapodhanapariṣadā sa mahāmuniḥ pratyavadat ?? 'atimahadidamāścaryyamākhyātavyam, alpaśeṣamahaḥ, pratyāsīdati ca naḥ snānasamayaḥ, bhavatāmapyatikrāmati devārccanavidhivelā, taduttiṣṭhantu bhavantaḥ, sarva eva tāvadācarantu yathocitaṃ divasavyāpāram, aparāhṇasamaye bhavatāṃ punaḥ kṛtaphalamūlāśanānāṃ visrabdhopaviṣṭānāmāditaḥ prabhṛti sarvamāvedayiṣyāmi / | | kad pb1.261 | asti sakalatribhuvanalalāmabhūtā, prasavabhūmiriva kṛtayugasya, ātmanivāsocitā bhagavatā mahākālābhidhānena bhuvanatrayasargasthitisaṃhārakāraṇena pramathanāthenāpareva pṛthivī samutpāditā, dvitīyapṛthivīśaṅkayā ca jalanidhineva rasātalagabhīreṇa parikhāvalayena parivṛtā, paśupatinivāsaprītya ca gaganaparisarollekhiśikharamālena kailāsagiriṇeva sudhāsitena prākāramaṇḍalena parigatā, prakaṭaśaṅkhaśuktimuktāprabālamarakatamaṇirāśibhiścāmīkaracūrṇasikatānikaranicitairāyāmibhiragastyaparipītasalilaiḥ sāgarairiva mahāvipaṇipathairupaśobhitā, surāsurasiddhagandharvavidyādharoragādhyāsitābhiścitraśālābhiraviratotsavapramadāvalokanakutūhalādambaratalādavatīrṇābhirdivyavimānapaṅktibhirivālaṅkṛtā, mathanoddhatadugdhadhavalitamandaradyutibhiḥ kanakamayāmalakalaśaśikharairaniladolāyitasitadhvajairuparipatadabhragaṅgairiva tuṣāragiriśisvarairamaramandirairvirājitaśṛṅgāṭakā, sudhāvedikopaśobhitodapānairanavaratacalitajalaghaṭīyantrasicyamānaharitopavanāndhakāraiḥ ketakīdhūlidhūsarairupaśalyakairupaśobhitā, madamukharamadhukarapaṭalāndhakāritaniṣkuṭā, sphuradupavanalatākusumaparimalasurabhisamīraṇā, raṇitasaubhāgyaghaṇṭairālohitāṃśukapatākairābaddharaktacāmarairvidrumamayaiḥ pratibhavanam ucchritairmakarāṅkitaiḥ madanayaṣṭiketubhiḥ prakāśitamakaradhvajapūjā, satatapravṛttādhyayanadhvanidhautakalmaṣā, stimitamurajaravagambhīragarjiteṣu salilaśīkarāsāraracitadurddineṣu paryyastaravikiraṇaracitasuracāpacāruṣu dhārāgṛheṣu mattamayūramaṇḍalairmaṇḍalīkṛtaśikhaṇḍaistāṇḍavavyasanibhirābadhyamānakekāravakolāhalā, vikacakuvalayakāntairutphullakumudadhavalodarairanimiṣadarśanaramaṇīyairākhaṇḍalalocanairiva sahasrasaṃkhyairudbhāsitā sarobhiḥ, aviralakadalīvanakalitābhiramṛtaphenapuñjapāṇḍurābhirdiśi diśi dantavalabhikābhirdhavalīkṛtā, yauvanamadamattamālavīkucakalaśakṣubhitasalilayā bhagavato mahākālasya śirasi surasariamālokya samupajāterṣyayeva satatābaddhataraṅgabhrukuṭīlekhayā khamiva kṣālayantyā śiprayā parikṣiptā, sakalabhuvanakhyātayaśasā harajaṭācandreṇeva koṭisāreṇa mainākenevāviditapakṣapātena mandākinīpravāheṇeva prakaṭitakanakapadmarāśinā smṛtiśāstreṇeva sabhāvasathakūpaprapārāmasurasadanasetuyantrapravarttakena mandareṇevoddhṛtasamastasāgararatnasāreṇa saṃgṛhītagāruḍenāpi bhujaṅgabhīruṇā, khalopajīvinā'pi praṇayijanopajīvyamānavibhavena, vīreṇāpi vinayavatā, priyaṃvadenāpi satyavādinā, abhirūpeṇāpi svadārasantuṣṭena, atithijanābhyāgamārthināpi paraprārthanānabhijñena, kāmārthapareṇāpi dharmmapradhānena, mahāsattvenāpi paralokabhīruṇā, sakalavijñānaviśeṣavidā vadānyena, dakṣeṇa smitapūrvābhibhāṣiṇā parihāsapeśalena, ujjvalaveśena śikṣitāśeṣadeśabhāṣeṇa vakroktinipuṇena ākhyāyikākhyānaparicaya catureṇa sarvalipijñena mahābhāratapurāṇarāmāyaṇānurāgiṇā bṛhatkathākuśalena dyūtādikalākalāpapārageṇa śrutarāgiṇā subhāṣitavyasaninā praśāntena surabhimāsamāruteneva satatadakṣiṇena, himagirikānanenevāntaḥsaralena, lakṣmaṇeneva rāmārādhananipuṇena, śatrughnenevāviṣkṛtabharataparicayena, divaseneva mitrānuvarttinā, baudheneva sarvāstivādaśūreṇa, sāṃkhyāgameneva pradhānapuruṣopetena, jinadharmmeṇeva jīvānukampinā, vilāsijanenādhiṣṭhitā, saśaileva prāsādaiḥ, saśākhānagareva mahābhavanaiḥ, sakalpavṛkṣeva satpuruṣaiḥ, darśitaviśvarūpeva citrabhittibhiḥ, sandhyeva padmarāgānurāgiṇī, amarādhipamūrttiriva makhaśatānaladhūmapūtā, paśupatilāsyakrīḍeva sudhādhavalāṭṭahāsā, vṛddheva jātarūpakṣayā, garuḍamūrttirivācyutasthitiramaṇīyā, prabhātaveleva prabuddhasarvalokā, śabaravasatirivāvalambitacārucāmaranāgadantadhavalagṛhā, śeṣatanuriva sadāsannavasudhādharā, jaladhimathanaveleva mahāghoṣapūritadigantarā, prastutābhiṣekabhūmiriva sannihitakanakaghaṭasahasrā, gaurīva mahāsiṃhāsanocitamūrttiḥ, aditiriva devakulasahasrasevyā, mahāvarāhalīleva darśitahiraṇyākṣapātā, āstīkatanuriva ānanditabhujaṅgalokā, harivaṃśakatheva anekabālakrīḍāramaṇīyā, prakaṭāṅganopabhogāpyakhaṇḍitacaritrā, raktavarṇāpi sudhādhavalā, avalambitamuktākalāpāpi vihārabhūṣaṇā, bahuprakṛtirapi sthirā, vijitāmaraloka dyutiravantīṣūjjayinī nāma nagarī / | | kad pb1.363 | mahānarendralikhitamaṇḍalamadhyavarttinī vividhabalidānānanditadigdevatāni bahulacaturddaśīniśāsu catuṣpathe snānamaṅgalāni bheje / | | kad pb1.396 | nāma mahattarikā praśaste divase pradoṣavelāyāmabhyantarāsthānamaṇḍapagataṃ gandhatailāvasekajvalitadīpikāsahasraparivṛtam uḍunikaramadhyavarttinamiva paurṇamāsīśaśinam, uragarājaphaṇāmaṇisahasrāntarālasthitamiva nārāyaṇam, mūrddhāvasiktaiḥ pradhānanarendraiḥ parimitaiḥ parivṛtam, anatidūrāvasthitaparijanam, anantaramuttuṅgavetrāsanopaviṣṭena dhautadhavalāmbaraparidhānena nātyulbaṇaveṣeṇa jalanidhinevāgādhagāmbhīryyeṇa samupārūḍhaviśrambhanirbharāstāstāḥ kathāḥ śukanāsena saha kurvāṇam, bhūmipālamupasṛtya rahaḥ karṇamūle viditaṃ vilāsavatīgarbhavṛttāntamakārṣīt / | | kad pb1.398 | anālokitapūrvaṃ tu harṣaprakarṣāmabhisamīkṣya bhūpateḥ, kulavarddhanāñca smitavikasitamukhīmāgatāṃ dṛṣṭvā tasya cārthasya satataṃ manasi varttamānatvāt aviditavṛttānto'pi tatkālocitamaparamatimahato harṣasya kāraṇamapaśyan śukanāsaḥ svayamutprekṣya samutsapitāsanaḥ samīpataramupasṛtya nātiprakaṭamābabhāṣe ?? 'deva! kimasti kiñcittasmin svapnadarśaṃne satyam? atyantamutphullalocanā hi kulavarddhanā dṛśyate, devasyāpīdaṃ priyavacanaśravaṇakutūhalādiva śravaṇamūlamupasarpaduparacayadiva nīlakuvalayakarṇapūraśobhām, ānandajalapariplutaṃ taralatārakavikasadāvedayati mahat praharṣakāraṇamīkṣaṇayugalam, upārūḍhamahotsavaśravaṇakutūhalamutsukotsukaṃ klāmyati me manaḥ / | | kad pb1.401 | ahantu na śraddadhe, kuto'smākamiyatī bhāgyasampat, abhājanaṃ hi vayamīdṛśānāṃ priyavacanaśravaṇānām / | | kad pb1.418 | pārthivastu tanayānanadarśanamahotsavahṛtahṛdayo'pi divasavaśena mauhūrttikagaṇopadiṣṭe praśaste muhūrttenivāritanikhilaparijanaḥ śukanāsadvitīyaḥ maṇi mayamaṅgalakalasayugalāśūnyena āsaktabahuputrikālaṃkṛtena vividhanavapallavanivahanirantaranicitena sannihitakanakamayahalamusulayugena viralagrathitasitakusumamiśradūrvāprabālamālā'laṅkṛtena ālambitāvikalavyāghracarmaṇā vandanamālā'ntarālaghaṭitaghaṇṭāgaṇena dvāradeśena virājamānam, ubhayataśca dvārapakṣakayormaryādānipuṇena gomayamayībhiruttānavinihitavarāṭakaprakaradanturābhiḥ antarāntarābaddhavividhavarṇarāgarucirakārpāsakusumaleśalāñchitābhiḥ kusumbhakesaralavāśleṣalohitābhirlekhābhirālikhitasvastikabhaktijālamuparacayatā, hāridradravavicchuraṇapiñjarāmbaradhāriṇīṃ bhagavatīṃ ṣaṣṭhīdevīṃ kurvatā, vikacapakṣapuṭavikaṭaśikhaṇḍipṛṣṭhamaṇḍalādhirūḍham, ālolalohitapaṭaghaṭitapatākam, ullasitaśaktidaṇḍapracaṇḍaṃ kārttikeyaṃ saṅghaṭayatā vinyastālaktakapaṭalapāṭalamadhyabhāgau sūryācandramasāvābadhnatā, kuṅkumapaṅkapiñjarīkṛtām ūrdhvaprotakanakamayayavanikarakaṇṭikatām aviralalagnagaurasiddhārthakaprakaratayā kāñcanarasakhacitāmiva mṛnmayaguṭikākadambamālāṃ vinyasyatā, candanajaladhavaliteṣu bhittiśikharabhāgeṣu pañcarāgavicitracelacīrakalāpacihnitām āpītapiṣṭātakapaṅkāṅkitāṃ varddhamānakaparamparām anyāni ca sūtikāgṛhamaṇḍanamaṅgalāni sampādayatā purandhrivargeṇa samadhiṣṭhitam, upadvārasaṃyatavividhagandhakusumamālā'laṅkṛtajaracchāgam, akhilavrīhimadhyāvasthāpitāryavṛddhādhyāsitaśayanīyaśirobhāgam, anavaratadahyamānājyamiśrabhujaganirmokameṣaviṣāṇakṣodam, analapluṣyamāṇāriṣṭatarupallavollasitarakṣādhūmagandham, adhyayanamukharadvijagaṇaviprakīryyamāṇaśāntyudakalavam, abhinavalikhitamātṛpaṭapūjāvyagradhātrījanam, anekavṛddhāṅganā"rabdhasūtikāmaṇḍalagītikāmanoharam, uṣapādyamānasvastyayanam, kriyamāṇaśiśurakṣābalividhānam, ābadhyamānadhavalakusumadāmaśatam, avicchinnapaṭhyamānanārāyaṇanāmasahasram, amalahāṭakayaṣṭipratiṣṭhāpitairantaḥśubhaśatānīva niścalaśikhairdhyāyadbhirmaṅgalapradīpairudbhāsitam, utkhātāsilatāsanāthapāṇibhiḥ sarvato rakṣāpuruṣaiḥ parivṛtam, sūtikāgṛhamapaśyat / | | kad pb1.420 | praviśya ca prasavaparikṣāmapāṇḍuramūrterutsaṅgagataṃ vilāsavatyāḥ, svaprabhāsamudayopahatagarbhagṛhapradīpaprabham, aparityaktagarbharāgatvādudayaparipāṭalamaṇḍalamiva savitāram, aparasaṃdhyālohitabimbamiva candramasam, anupajātakāṭhinyamiva kalpatarupallavam, utphullamiva raktāravindarāśim, avanidarśanāvatīrṇamiva lohitāṅgam, vidrumakisalayadalairiva bālātapacchedairiva padmarāgaraśmibhiriva viracitāvayavam, anabhivyaktamukhapañcakamiva mahāsenam, suravanitākaratalaparibhraṣṭamivāmarapatikumāram, uttaptakalyāṇakāṛttasvarabhāsvarayā svadehaprabhayā pūrayantamiva vāsabhavanam, udbhāsamānaiḥ sahajabhūṣaṇairiva mahāpuruṣalakṣaṇairupetam, āgāmikālapālanaprahṛṣṭayeva śriyā samāliṅgitam, āhlādahetumātmajaṃ dadarśa / | | kad pb1.423 | samṛddhamanorathaḥ śukanāsastu śanaiḥ śaneraṅgapratyaṅgānyasya nirūpayan prītivisphāritalocanaḥ bhūmipālamavādaut ?? deva! paśya paśya, asya kumārasya garbhasampīḍanavaśādapari sphuṭāvayavaśobhasyāpi māhātmyamāvirbhāvayanti cakravarticihnāni / | | kad pb1.434 | atha nṛpatiḥ amṛtavṛṣṭipratimamākarṇya tadvacanaṃ prītivisphāritākṣaḥ pratyavadat ?? 'aho! kalyāṇaparamparā / | | kad pb1.437 | tasmai ca prītamanāḥ priyavacanānurūpaṃ puruṣāyāparimitaṃ pāritoṣikamādideśa / | | kad pb1.452 | sakalarājanyavaṃśavanadāvānalasya paraśurāmasyevāsya nārācāḥ śikhariśilātalabhido babhūvaḥ / | | kad pb1.568 | avatīryya ca karatalena kare vaiśampāyanamavalambya puraḥ savinayaṃ prasthitena balāhakenopadiśyamānamārgaḥ tribhuvanamiva puñjobhūtam, āgṛhītakanakavetralataiḥ sitavārabāṇaiḥ sitāṅgarāgaiḥ sitakusumaśekharaiḥ sitoṣṇīṣaiḥ sitaveṣaparigrahatayā śvetadvīpasambhavairiva kutayugapuruṣairiva mahāpramāṇairdivāniśamālikhitairiva utkīrṇairiva toraṇastambhaniṣaṇṇairdvārapālairanujjhitadvāradeśam, anekasañjavanacadraśālāviṭaṅkavedikāsaṅkaṭaśikharairabhraṅkaṣairupahasitakailāsaśailaśobhaiḥ amalasudhāvadātaiḥ saprāleyaśailamiva mahāprāsādaiḥ, anekavātāyanavivaravinirgatayuvatibhūṣaṇakiraṇasahasratayā kanakaśṛṅkhalājālakenevoparivistīrṇena virājamānam, antargatāyudhanivahābhirāśīviṣakulasaṅkulābhiḥ pātālaguhābhirivātigambhīrābhirāyudhaśālābhirupetam, abalācaraṇālaktakarasaraktamaṇiśakalaiḥ śikharanilīnaśikhikulakṛtakekāravakalakalaiḥ krīḍāparvatakairupaśobhitam, ujjvalavarṇakambalāvaguṇṭhitakanakaparyyāṇābhiḥ pralambacāmarakalāpa cumbita calakarṇapallavābhiḥkulayuvatibhirivoparūḍhaśikṣāvinayanibhṛtābhiḥ yāmakareṇukābhiraśūnyakakṣāntaram, ālānastambhaniṣaṇṇena ca navajaladharaghoṣagambhīram, anugatavīṇāveṇuravaramyam, āsphālitaghargharikāghargharam, anavaratamṛdumṛdaṅgadhvanim, āmīlitalocanatribhāgeṇa vāmadaśanakoṭiniṣāṇahastena niścalakarṇatālenākarṇayatā, salīlamubhayapārśvāvalambivarṇakambalatayā vindhyagiriṇevāviṣkṛtadhātuvicitrapakṣasampuṭena, ādhoraṇagītānandakṛtamandrakaṇṭhagarjitena, madajalaśabalaśaṅkhaśobhitaśravaṇapuṭena, rajanikarabimbacumbisaṃvarttakāmbudavṛndaviḍambakena karṇāntalambinā kāñcanamayena kṛtakarṇapūramivāṅkuśena mukhamadvahatā, madajalamalinena dvitīyeneva karṇacāmareṇa kapolataladolāyamānena madhukarakulenālaṅkriyamāṇena, atyudagratayā pūrvakāyasya ativāmanatayā ca jaghanabhāgasya pātālādiva uttiṣṭhatā, niśāsamayeneva parisphuratsārddhacandranakṣatramālena, śaradārambheṇeva prakaṭitāruṇacārupuṣkareṇa, vāmanarūpeṇeva kṛtatripadīvilāsena, sphaṭikagiritaṭeneva lagnasiṃhamukhapratimena, prasādhiteneva ālolakarṇapallavāhatamukhena, gandhamādananāmnā gandhahastinā sanāthīkṛtaikadeśam, ujjvalapaṭṭakambalapaṭuprāvāritapṛṣṭhaiśca rasitamadhuraghaṇṭikāravamukharakaṇṭhaiḥ, mañjiṣṭhālohitaskandhakesarabālaiḥ, nihatavanagajarudhirapāṭalasaṭairiva kesaribhiḥ, puronihitayavasarāśiśikharopaviṣṭamandurāpālaiḥ, āsannamaṅgalagītadhvanidattakarṇaiḥ, antaḥkapoladhṛtamadhurasarasalulitalājakavalaiḥ, bhūpālavallabhairmandurāgataisturaṅgamairudbhāsitam, adhikaraṇamaṇḍapagataiścāryyaveśairatyuccavetrāsanopaviṣṭairdharmmamayairiva dharmmādhikāribhirmahāpuruṣairadhiṣṭhitam, adhigatasakalagrāmanagaranāmabhirekabhavanamiva jagadakhilamālokayadbhirālikhitasakalabhuvanavyāpāratayā dharmmarājanagaravyatikaramiva darśayadbhiradhikaraṇalekhakairālikhyamānaśāsanasahasram, abhyantarāvasthitanarapatinirgamapratīkṣaṇapareṇa ca sthānasthāneṣu baddhamaṇḍalena, kanakamayārddhacandratārāgaṇaśavalaiḥ carmmaphalakairniśāsamayamiva darśayatā, sphuritaniśitakaravālakaraprarohakarālitātapena,ekaśravaṇapuṭaghaṭitadhavaladantapatreṇa ūrdhvabaddhamaulikalāpena, dhavalacandanasthāsakakhacitabhujorudaṇḍena, baddhāsidhenukena, andhradraviḍasiṃhalaprāyeṇa sevakajanena, āsthānamaṇḍapagatena ca yathocitāsanopaviṣṭena prasārayatā durodarakrīḍām, abhyasyatā'ṣṭāpadavyāpāram, āsphālayatā parivādinīm, ālikhatā citraphalake bhūmipālapratibimbam, ābadhnatā kāvyagoṣṭhīm, ātanvatā parihāsakathām, vindatā bindumatīm, cintayatā prahelikām, bhāvayatā narapatikṛtakāvyasubhāṣitāni, paṭhatā dvipadīm, gṛhṇatā kaviguṇān, utkiratā patrabhaṅgān, ālapatā vāravilāsinījanam, ākarṇayatā vaitālikagītam, anekasahasrasaṃkhyena dhavaloṣṇīṣapaṭāśliṣṭavikaṭakirīṭasaṅkaṭaśirasāsanirjharaśikharalagnabālātapamaṇḍaleneva kulaparvatacakravālena, mūrddhābhiṣiktena, sāmantalokenādhiṣṭhitam, āsthānotthitabhūmipālasaṃvarttitānāñca kuthānāṃ ratnāsanānāñca rāśibhiranekavarṇairindrāyadhapuñjairiva virājitasabhāparyyantam, amalamaṇibhūmisaṃkrāntamukhanivahapratibimbatayā vikacakamalapuṣpaprakaramiva sampādayatā, gativaśaraṇitanūpurapārihāryyaraśanāsvanamukhareṇa, skandhāvasaktakanakadaṇḍacāmareṇa, nirgacchatā praviśatā cānavarataṃ vāravilāsinījanenākulitam, ekadeśaniṣaṇṇacāmīkaraśṛṅkhalāsaṃyataśvagaṇam, itastataḥ pracalitaparicitāmitakastūrikākuraṅgaparimalavāsitadiṅmukham, anekakubjakirātavarṣavarabadhiravāmanamūkasaṅkulam, upāhṛtakinnaramithunam, ānītavanamānuṣam, ābaddhameṣakukkuṭakurarakapiñjalalāvakavarttikāyuddham, utkūjitacakorakādambahārītakokilam, lālapyamānaśukasārikam, ibhapatimadaparimalāmarṣajṛmbhitaiśca niṣkūjadbhiḥ śikhariṇāṃ jīvitairiva giriguhānivāsibhirgṛhītaiḥ pañjarakesaribhirudbhāsyamānam, uttrasyamānaiḥ kāñcanabhavanaprabhājanitadāvānalaśaṅkairlolatārakairbhramadbhirvanahariṇakadambakairlocanaprabhayā śavalīkṛtadigantaram, uddāmakekāravānumīyamānamarakatakuṭṭīmasthitaśikhaṇḍimaṇḍalam, atiśiśiracandanaviṭapicchāyāniṣaṇṇanidrāyamāṇagṛhasārasam, antaḥpureṇa ca bālikājanaprastutakandukapañcālikākrīḍena, aviratavāhyamānadolāśikharakvaṇitaghaṇṭāṭaṅkārapūritāśāmukhena, bhujaganirmmokaśaṅkitamayūrahriyamāṇahāreṇa, saudhaśikharāvatīrṇapracalitapārāvatakulatayā sthalotpalinīvanaśobhiteneva, antaḥpurikājanaprastutanarapaticaritaviḍambanakroḍena, aśvamandurāparibhraṣṭāgatairavaluptabhavanadāḍimīphalairākhaṇḍitāṅganasahakārapallavairabhibhūtakubjavāmanakirātakaratalācchinnāni bhūṣaṇāni vikiradbhiḥ kapibhirākulīkṛtena, śukasārikāprakāśitasuratavisrambhālāpalajjitāvarodhajanena, prāsādasopānasamārohaṇacalitairabalānāṃ caraṇāvasaktairmaṇimayaiḥ pade pade raṇadbhistulākoṭivalayairdviguṇīkṛtakūjitarutābhiḥ bhavanakalahaṃsamālābhirdhavalitāṅganena, dhṛtadhautadhavaladukūlottarīyaiḥ kaladhautadaṇḍāvalambibhiḥ palitapāṇḍuramaulibhirācāramayairiva vinayamayairiva maryyādāmayairiva maṅgalamayairiva gambhīrākṛtibhiḥ svabhāvadhīrairuṣṇīṣibhirvayaḥpariṇāme'pi jaratsiṃhairivāparityaktasattvāvaṣṭambhaiḥ kañcukibhiradhiṣṭhitena samupetābhyantaram, jaladharasanāthamiva kṛṣṇāgurudhūmapaṭalaiḥ, sanīhāramiva yāmakuñjaraghaṭākaraśikaraiḥ, saniśamiva tamālavīthikāndhakāraiḥ, sabālātapamiva raktāśokaiḥ, satārāgaṇamiva muktākalāpaiḥ, savarṣāsamayamiva dhārāgṛhaiḥ, sataḍillatamiva hemamayībhirmayūrayaṣṭibhiḥ, sagṛhadaivatamiva śālabhañjikābhiḥ, śivabhavanamiva dvārāvasthitadaṇḍapāṇipratīhāragaṇam, utkṛṣṭakavigadyamiva vividhavarṇaśreṇipratipādyamānānekābhinavārthasañcayam, apsarogaṇamiva prakaṭamanoramārambham, divasakarodayamiva ullasatpadmākarakamalāmodam, uṣṇakiraṇamiva nijalakṣmīkṛtakamalopakāram, nāṭakamiva patākāṅkaśobhitam, śoṇitapuramiva bāṇāyogyāvāsopetam, purāṇamiva vibhāgāvasthāpitasakalabhuvanakośam, sampūrṇacandrodayamiva mṛdukarasahasrasaṃvarddhitaratnālayam, diggajamivāvicchinnamahādānasantānam, brahmāṇḍamiva sakalajīvalokavyavahārakāraṇotpannahiraṇyagarbham, īśānabāhuvanamiva mahābhogimaṇḍalasahasrādhiṣṭhitaprakoṣṭham, mahābhāratamivānantagītākarṇanānanditanaram, yaduvaṃśamiva kulakramāgataśūrabhīmapuruṣottamabalaparipālitam, vyākaraṇamiva prathamamadhyamottamapuruṣavibhaktisthitānekādeśakārakākhyātasampradānakriyāvyayaprapañcasusthitam, udadhimiva bhayāntaḥpraviṣṭasapakṣabhūmibhṛtsahasramaṅkulam, uṣāniruddhasamāgamamiva citralekhādarśitavicitrasakala tribhuvanākāram, baliyajñamiva purāṇapuruṣavāmanādhiṣṭhitābyantaram, śuklapakṣapradoṣamiva vitataśaśikiraṇakalāpadhavalāmbaravitānam, | | kad pb1.607 | krameṇa ca pratīcīṃ karṇapūraraktotpale lokāntaramupagate bhagavati gabhastimālini, samullasitāyāmambarataḍāgavikacakamalinyāṃ sandhyāyām, kṛṣṇāgurupaṅkapatralatāsthiva timiralekhāsu sphurantīṣu diśāṃ mukheṣu, alikulamalinena kuvalayavaneneva raktakamalākare timiranikareṇa utsāryamāṇe sandhyārāge, kamalinīnipītamātapamunmūlayitumandhakārakarapallaveṣviva praviśatsu raktakamalodarāṇi madhukarakuleṣu, śanaiḥ śanaiśca niśāvilāsinīmukhāvataṃsapallave galite sandhyārāge, dikṣu vikṣipteteṣu sandhyādevatāccanabalipiṇḍeṣu, śikharadeśalagnatimirāsvanārūḍhamayūrāsvapi mayūrādhiṣṭhitāsviva mayūrayaṣṭiṣu, gavākṣavivaranilīneṣu prāsādalakṣmīkarṇotpaleṣviva pārāvateṣu, vigatavilāsinīsaṃvāhananiścalakāñcanapīṭhāsu mūkībhūtaghaṇṭāsu antaḥpuradolāsu, bhavanasahakāraśākhāvalambitapañjareṣu, śukasārikānivaheṣu, saṅgītavirāmaviśrāntaravāsūtsāryyamāṇāsu vīṇāsu, yuvatinūpuraśabdopaśamanibhṛteṣu bhavanakalahaṃseṣu, apanīyamānakarṇaśaṅkhacāmaranakṣatramālāmaṇḍaneṣu madhukara śunyakapolabhittiṣu mattavāraṇeṣu, pradīpyamāneṣu rājavallabhaturaṅgamamandurāpradīpeṣu praviśantīṣu prathamayāma kuñjaraghaṭāsu, kṛtasvastyayaneṣu niṣkrāmatsu purohiteṣu, visarjitarājalokaviralaparijaneṣu vistāriteṣviva rāja kulakakṣāntareṣu, prajvalitadīpikāsahasrapratibimbacumbiteṣu kṛtavikacacanpakadalopahāreṣviva maṇibhūmikuṭṭimeṣu, nipatitadīpālokāsu ravivirahārttanalinīvinodanāgatabālātapāsviva bhavadīghikāsu, nidrālaseṣu pañjarakesariṣu, samāropitakārmmuke gṛhītasāyake yāmika ivāntaḥpurapraviṣṭe makaraketau, avataṃsapallaveṣviva sarāgeṣu karṇe kriyamāṇeṣu suratadvatīvacaneṣu, sūryakāntamaṇibhya iva saṃkrāntānaleṣu jvalatsu māninīnāṃ śokavidhureṣu hṛdayeṣu, pravṛttai pradoṣasamaye candrāpīḍaḥ prajvalitadīpikācakravālaparivāraścaraṇābhyāmeva rājakulaṃ gatvā pituḥ samīpe muhūrttaṃ sthitvā dṛṣṭvā ca vilāsavatīmāgatya svabhavanamanekaratnaprabhāśabalamuragarājaphaṇāmaṇḍalamiva hṛṣīkeśaḥ śayanatalamadhiśiśye / |
|
