|
|
|
|
Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
|
kad ub1.1008 | bhareṇeva gambhīragarjitaikasaṃtānotkampitadharāpīṭhabandhairnabhasi navaghanaiḥ, ghanajaladhārātipātavācālitacañcubhirantarāle cātakaiḥ, uddāmamahārāvarāvibhiravanimūle darduraiḥ, anavaratajhāṃkāraravajarjaritadhārāmbubhirāśāsu jaladānilaiḥ, unmuktamadakalakekākolāhalaiḥ kānaneṣu kalāpibhiḥ, asamaśikharopalaskhalanakalakalamukharairgiriṣu nirjhraraiḥ, ullolakallolāsphālavisphāritaviṣamanirghoṣajhātkāribhiḥ saritsu pūraiḥ, sarvataśca vitatena sthalīṣu saṃhatena kandareṣūccaṇḍena śikhariṣu kalakalenāmbuṣu paṭunā parvatataṭeṣu mṛdunā śādvaleṣu cāruṇā palvaleṣu sāndreṇa śākhiṣu tanunā tṛṇolapeṣūlbaṇena tālīvaneṣu yathādhārāpatanamākarṇyamānena sarvaprakāramadhureṇa hṛdayapraveśinā dhārāraveṇotkalikākalito na rātrau na divā na grāme nāraṇye nāntarna bahirna vane nopavane na vartmani nāvāse na vahanna tiṣṭhanna vaiśampāyanasmaraṇe na kādambarīsamāgamānudhyāne na kathaṃcidapi na kvacidapi nirvṛtimevādhyagacchat / | kad ub1.1009 | anadhigatanirvṛtiścātikaṣṭatayā vajrānalasyeva jaladasamayendhanasya madanahutabhujo bhasmasātkartumivodyatasya dhīrasvabhāvopi prakṛtimevotsasarja / | kad ub1.1010 | plāvitasakaladharātalairdhārājalairapyaśoṣyata / |
|
|
|
|