Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
kad pb1.1147 | atrāntare jhaṭiti candramaṇḍalavinirgataḥ gaganādavatīryya keyūrakoṭilagnamamṛtaphenapiṇḍapāṇḍuraṃ pavanataralamaṃśukottarīyamākarṣan, ubhayakarṇāndolitakuṇḍalamaṇiprabhāraktagaṇḍasthalaḥ, sthūlamuktāphalatayā tārāgaṇamiva grathitam atitāraṃ hāram urasā dadhānaḥ, dhavaladukūlapallavakalpitoṣṇīṣagranthiḥ, alikulanīlakuṭilakuntalanikaravikaṭamauliḥ, utphullakumudakarṇapūraḥ, kāminīkucakuṅkumapatralatālāñchitāṃsadeśaḥ, kumudadhavala dehaḥ, mahāpramāṇaḥ, puruṣo mahāpuruṣalakṣaṇopeto divyākṛtiḥ, svacchavāridhavalena dehaprabhāvitānena kṣālayanniva digantarāṇi, āmodinā ca śarīrataḥ kṣaratā śiśireṇa śīṭajvaramiva janayatā amṛtaśīkaranikaravarṣeṇa tuṣārapaṭalenevānulimpan, gośīrṣacandanarasacchaṭābhirivāsiñcan, airāvatakarapīvarābhyāṃ bāhubhyāṃ mṛṇāladhavalāṅgulibhyāmatiśītalasparśābhyāṃ tamuparatamutkṣipan, dundubhinādagambhīreṇa svareṇa 'vatse, mahāśbete! na parityājyāḥ tvayā prāṇāḥ, punarapi tavānena saha bhaviṣyati samāgamaḥ' ityevamādṛtaḥ pitevābhidhāya sahaivānena gaganatalamudapatat / | kad pb1.1148 | ahantu tena vyatikareṇa sabhayā savismayā sakautukā conmukhī kimidamiti kapiñjalamapṛccham / | kad pb1.1149 | asau tu sasambhramamadattvaivottaramudatiṣṭhat â 'durātman! kva me vayasyamapahṛtya gacchasi' ityabhidhāyānmukhaḥ sañjātakopo badhnan savegam uttarīyavalkalena parikaram, utpatantaṃ tamevānusarannantarikṣamudagāt / |
|