kad pb1.418 | pārthivastu tanayānanadarśanamahotsavahṛtahṛdayo'pi divasavaśena mauhūrttikagaṇopadiṣṭe praśaste muhūrttenivāritanikhilaparijanaḥ śukanāsadvitīyaḥ maṇi mayamaṅgalakalasayugalāśūnyena āsaktabahuputrikālaṃkṛtena vividhanavapallavanivahanirantaranicitena sannihitakanakamayahalamusulayugena viralagrathitasitakusumamiśradūrvāprabālamālā'laṅkṛtena ālambitāvikalavyāghracarmaṇā vandanamālā'ntarālaghaṭitaghaṇṭāgaṇena dvāradeśena virājamānam, ubhayataśca dvārapakṣakayormaryādānipuṇena gomayamayībhiruttānavinihitavarāṭakaprakaradanturābhiḥ antarāntarābaddhavividhavarṇarāgarucirakārpāsakusumaleśalāñchitābhiḥ kusumbhakesaralavāśleṣalohitābhirlekhābhirālikhitasvastikabhaktijālamuparacayatā, hāridradravavicchuraṇapiñjarāmbaradhāriṇīṃ bhagavatīṃ ṣaṣṭhīdevīṃ kurvatā, vikacapakṣapuṭavikaṭaśikhaṇḍipṛṣṭhamaṇḍalādhirūḍham, ālolalohitapaṭaghaṭitapatākam, ullasitaśaktidaṇḍapracaṇḍaṃ kārttikeyaṃ saṅghaṭayatā vinyastālaktakapaṭalapāṭalamadhyabhāgau sūryācandramasāvābadhnatā, kuṅkumapaṅkapiñjarīkṛtām ūrdhvaprotakanakamayayavanikarakaṇṭikatām aviralalagnagaurasiddhārthakaprakaratayā kāñcanarasakhacitāmiva mṛnmayaguṭikākadambamālāṃ vinyasyatā, candanajaladhavaliteṣu bhittiśikharabhāgeṣu pañcarāgavicitracelacīrakalāpacihnitām āpītapiṣṭātakapaṅkāṅkitāṃ varddhamānakaparamparām anyāni ca sūtikāgṛhamaṇḍanamaṅgalāni sampādayatā purandhrivargeṇa samadhiṣṭhitam, upadvārasaṃyatavividhagandhakusumamālā'laṅkṛtajaracchāgam, akhilavrīhimadhyāvasthāpitāryavṛddhādhyāsitaśayanīyaśirobhāgam, anavaratadahyamānājyamiśrabhujaganirmokameṣaviṣāṇakṣodam, analapluṣyamāṇāriṣṭatarupallavollasitarakṣādhūmagandham, adhyayanamukharadvijagaṇaviprakīryyamāṇaśāntyudakalavam, abhinavalikhitamātṛpaṭapūjāvyagradhātrījanam, anekavṛddhāṅganā"rabdhasūtikāmaṇḍalagītikāmanoharam, uṣapādyamānasvastyayanam, kriyamāṇaśiśurakṣābalividhānam, ābadhyamānadhavalakusumadāmaśatam, avicchinnapaṭhyamānanārāyaṇanāmasahasram, amalahāṭakayaṣṭipratiṣṭhāpitairantaḥśubhaśatānīva niścalaśikhairdhyāyadbhirmaṅgalapradīpairudbhāsitam, utkhātāsilatāsanāthapāṇibhiḥ sarvato rakṣāpuruṣaiḥ parivṛtam, sūtikāgṛhamapaśyat / |